Bıyl Maqtaralda aǵyn sý máselesi bolýy tıis emes - Islam Ábishev

ShYMKENT. QazAqparat - QR Aýyl sharýashylyǵy mınıstrligi Sý resýrstary komıtetiniń tóraǵasy Islam Ábishev is-saparmen Ońtústik Qazaqstan oblysynda boldy. Maqtaral aýdanynyń aǵyn sý júıeleriniń qazirgi jaǵdaıymen tanysqan sý komıteti basshysy aýdan turǵyndarymen arnaıy jıyn ótkizdi, dep habarlaıdy QazAqparat HAA tilshisi.

   
Dıhandar men sala mamandary bas qosqan jıynda óńirdegi aǵyn sý máselesindegi atqarylyp jatqan jumystar men PÝID-2 jobasynyń aıasynda atqarylýy tıis jumystar baıandaldy. Aýyl sharýashylyǵy mınıstrliginiń bastamasy boıynsha iske asyrylyp jatqan «Irrıgatsııalyq jáne drenajdyq júıelerdi jetildirý (PÝID-2)» jobasynyń ekinshi kezeńi aıasynda Maqtaral aýdanyndaǵy sýarmaly jerlerdiń tuzdaný dárejesin boldyrmaý sharalary atqarylýda. Islam Ábishev osy maqsatta oblysqa bólinetin 32 mıllıard teńgeniń 22 mıllıard teńgesi Myrzashól óńirine beriletinin atap ótti.
 

«Maqtaral - árdaıym Elbasymyzdyń, Úkimettiń, bizdiń nazarymyzdan shyqqan emes. Biz mundaǵy aǵyn sý máselelerimen jaqsy tanyspyz. Dostyq kanalynan Ózbekstannyń 112 myń gektar jeri, Qazaqstannyń 136 myń gektar jeri sýarylady. Biz Ózbekstan Respýlıkasymen kelisip, sýdy teń  túrde bólisetin boldyq. Buryn kórshi memleket ózderiniń gıdrobeketterine bizdi jibermeıtin, al qazir biz olardy teksere alatyndaı ýaǵdalastyqqa qol jetkizdik. Sondyqtan, bıyl Maqtaralda aǵyn sý máselesi bolýy tıis emes» - dedi I.Ábishev.

Jıyn sońynda aýdan sharýalary I.Ábishevke másele kóterip, kókeıde júrgen saýaldaryn qoıdy. Jazda aǵyn sý tapshylyǵyn tartyp, qıyndyq kóretin dıqandar Sý komıteti basshysynan mardymdy jaýaptar aldy.