Bıyl Maqtaaralda 38 myń gektar jerge maqta egiledi

MAQTAARAL. QazAqparat - Cáýir aıynyń ortasynan bastap Maqtaaral aýdanynda aýa-raıy kúrt jylynyp, sharýalar maqta egý naýqanyna jappaı kirisip ketti, dep habarlaıdy QazAqparat.

Óńirlik kommýnıkatsııalar qyzmetiniń málimetinshe, kóktemgi dala jumystaryna 954 aýyl sharýashylyǵy traktorlary, 415 chızel, 3876 tyrma, 250 tuqym sepkish tehnıkalary qatysýda. Birqalypty qolaıly temperatýra saqtalǵan jaǵdaıda 10-15 kúnde jappaı maqta egisin aıaqtaýǵa múmkindik bar. Bul týraly sharýa qojalyqtaryn aralap kórip, maqta egý naýqanynyń jumys barysymen tanysqan aýdandyq aýyl sharýashylyǵy bóliminiń basshysy Ǵalym Dúısenbekov málim etti.

Bıyl maqtaaraldyq sharýalar 38 myń gektar jerge aq altyn shıtin sebedi dep kútilýde. Ol úshin 825 tonna tuqymdyq shıt daıyndalyp, sortyna qaraı 230-300 teńge aralyǵynda saýdalanýda. Aýdannyń sharýashylyqtary maqtanyń otandyq joǵary sapaly tuqymymen 98 paıyz qamatamasyz etilgen.

«Maqta egý kezinde topyraqtyń qunarlyǵyna baılanysty túp sannyń jıiligi jeke-jeke belgilenýi tıis. Topyraǵy jeńil, qunarlyǵy tómen jerlerde qozanyń jıiligi ár gektaryna 130-150 myń túp aralyǵynda, al topyraǵy aýyr, qunarlyǵy kúshti, jer asty sýy deńgeıi joǵary egis alqaptarynda ár gektaryna 120-130 myń túp ornalasýy qajet. Júıekterdiń qatar aralyǵy 90 santımetr dep eseptegende, ár metrge birinshi jaǵdaıda 15-17, al ekenshi jaǵdaıda 13-15 tuqymdyq shıt sebilýi tıis» - deıdi sharýalarǵa keńesin bergen «Qazaq maqta sharýashylyǵy» ǵylymı-zertteý ınstıtýtynyń dırektory, akademık Ibadýlla Úmbetaev.
Qazirdiń ózinde Maqtaaral aýdanynda 31668 gektar jer tyrmalanyp, 16235 gektar jer chızeldengen. Jeri egýge daıyn bolǵan sharýalar búginniń ózinde 778 gektar jerge maqta dánin seýip úlgeripti. Sondaı-aq, jyldyń basynan beri 4250 gektar jerge baqsha, 1620 gektar jońyshqa, 395,5 gektar kókónis, 55 gektar bıdaı, 50 gektar kúnbaǵys egilip, sharýalar kókónis ónimderin eksportqa shyǵarýda.

Aıta keteıik, ótken 2019 jyly aýdanda aýyl sharýashylyǵy óniminiń kólemi 44 mıllıard teńgege jetken bolatyn. Onyń ishinde ósimdik sharýashylyǵy 32,2 mıllıard teńge, mal sharýashylyǵy 10,4 mıllıard teńge, aýyl sharýashylyq qyzmeti 278 mıllıon teńgeni qurap edi.
Byltyr aýdanda 38 myńnan asa gektar jerge maqta daqyly egilip, 99,5 myń tonna «aq ulpa» qambaǵa jınaldy. Ortasha ónimdilik gektaryna 26,1 tsentnerge jetip, maqtashylar jyldy tolaǵaı tabyspen aıaqtaǵan bolatyn.