Bıyl Qyzylordada mal urlaý deregimen 30 qylmystyq is sotqa joldanǵan

QYZYLORDA. QazAqparat - Qyzylorda oblysynda bıyl mal urlaý deregimen sotqa 30 qylmystyq is joldanǵan, dep habarlaıdy QazAqparat tilshisi.

Óńirde bıyl 6 aı kóleminde mal urlyǵy tómendegen.

30 is boıynsha 68 mal basynyń 34,8 mln teńge kólemindegi shyǵyny jábirlenýshilerdiń paıdasyna óndirildi.

«Alǵashqyda mal urlaý deregimen tirkelip, keıinnen polıtsııa qyzmetkerleri júrgizgen jumystyń nátıjesinde maly tabylǵan azamattar bar. Osynyń nátıjesinde 98 mal jábirlenýshilerge qolhat arqyly qaıtarylǵan. Qaraýsyz júrgen mal ıelerine QR Ákimshilik quqyq buzý týraly kodeksiniń 408-babymen ákimshilik shara qoldandyq. Al veterınarııa qyzmetiniń tıisti qujatynsyz mal nemese et ónimderin tasymaldaǵan 62 tulǵa atalǵan kodekstiń 406-babymen jaýapkershilikke tartyldy. Óńirde qalyptasqan jedel ahýaldy eskere otyryp, azamattardyń quqyqtyq saýatyn arttyrýǵa baǵyttalǵan túsindirme aqparat ázirlendi. Qylmystyń ósim alǵan túrlerine tosqaýyl qoıý maqsatynda aldyn alý profılaktıkalyq jumys kúsheıtilip jatyr», - deıdi Qyzylorda oblysy polıtsııa departamentiniń bastyǵy Sultan Bektóre.

Eske salsaq, budan buryn Qyzylordada tólem qabyldaıtyn 3 termınaldy urlaǵan jigit ustaldy.