Bıyl qysta Qazaqstan joldary 771 márte jabylǵan

NUR-SULTAN. QazAqparat – 2022 jyldyń birinshi toqsanynda jol apaty sany azaıdy. Bul týraly QR Premer-mınıstri Álıhan Smaıylov depýtattyq saýalǵa bergen jaýabynda málimdedi, dep habarlaıdy QazAqparat tilshisi.

«Statıstıka derekterine sáıkes, elimizde bıylǵy birinshi toqsanda jol-kólik oqıǵalary men onda jaralanǵan azamattar sany (1%), onyń ishinde respýblıkalyq joldarda jáne eldimekenderde (tıisinshe 2% jáne 4%) tómendegeni baıqalady. Qysqy kezeńniń basynan beri elimizdiń avtojoldarynda 771 qozǵalys shekteýi engizildi, onyń ishinde 110 shekteý – kóktaıǵaq sebebinen salynǵan» dep jazady Á. Smaıylov depýtattyq saýalǵa bergen jaýabynda.

Úkimet basshysy qysqy kezeńde qaýipsizdikti qamtamasyz etý úshin qabyldanǵan sharalardy atap ótti.

«Qys mezgilinde úzdiksiz jáne qaýipsiz jol qozǵalysyn qamtamasyz etý maqsatynda jalpy uzyndyǵy 96 myń shaqyrym jolǵa, onyń ishinde 25 myń shaqyrymǵa jýyǵy – respýblıkalyq mańyzy bar jáne 71 myń shaqyrymy – oblystyq jáne aýdandyq mańyzy bar avtojoldarǵa qyzmet kórsetiledi. Barlyǵy 1,3 myńnan astam jol-eksplýatatsııalyq tehnıka bar, ótken qysqy kezeńde kún saıyn 600-ge jýyq tehnıka paıdalanylǵan. Avtojoldardy tıisti jaǵdaıda ustaý, sonyń ishinde jol jıekterin jáne júrý bóligin tazartý, qardan qorǵaıtyn transheıalar men qalqandardy jáne kóktaıǵaq paıda bolǵan ýchaskelerde ınertti materıaldardy (tuz, qum, elek jáne basqa) paıdalaný jumystary júıeli negizde júrgiziledi», - dedi Á. Smaıylov.

Onyń aıtýynsha, halyqty aýa raıynyń nasharlaýy týraly aqparattandyrý maqsatynda «112» shuǵyl nómirinen tıisti sms-habarlamalar jiberiledi.

«Qysqy kezeńge daıyndyq boıynsha is-sharalar josparyna sáıkes, óndiristik bazalardyń daıyndyǵy pysyqtaldy (qazandyqtar, jylytý pýnktileri, garajdar jáne basqa), qaýipti ýchaskelerde ýaqytsha jol belgileri ornatyldy, qar basatyn keı ýchaskelerge (uzyndyǵy 3 myń km) jaýapty tulǵalar men qajetti jol tehnıkasy bekitildi», - dedi Premer-mınıstr.