Bıyl Qostanaıdaǵy 43 aýyl sýmen jabdyqtalady

ASTANA. QazAqparat – Qostanaı oblysynda jyl sońyna deıin 43 aýyl aýyz sýmen qamtylady. Bul týraly aımaq ákimi Qumar Aqsaqalov aıtty, dep habarlaıdy QazAqparat tilshisi.

«Qazaqstan Prezıdenti 5 jyl ishinde qalalar men aýyldardy 100% taza aýyz sýmen qamtamasyz etýdi tapsyrdy. Bul halyqtyń ómir súrý sapasyna tikeleı áser etetin basym mindet. Sýmen qamtamasyz etýge 22 mlrd teńge bólindi, bul kórsetkish 16,5%-ke artty», - dedi Q. Aqsaqalov Ortalyq kommýnıkatsııalar qyzmetinde ótken baspasóz máslıhatynda.

Ákimniń aıtýynsha, jyl sońyna deıin 43 aýyldy, shamamen onda turatyn 43,5 myń adamdy sýmen qamtý jáne jaqsartý josparlanýda.

«Nátıjesinde, 2023 jyldyń qorytyndysy boıynsha aýyl turǵyndaryn sýmen jabdyqtaý qyzmetterine qoljetimdilik 80,4%-ten 87%-ke deıin artady», - dedi Qumar Aqsaqalov.

Ásirese, bıyl Arqalyq qalasyn, Amangeldi jáne Jangeldın aýdandaryn damytýǵa erekshe kóńil bólinip otyr. Oblystyń osy óńirlerin damytýǵa 23,1 mlrd teńge bólindi. Onyń 3,7 mlrd teńgesi sýmen jabdyqtaý jelilerin damytýǵa jumsalady.

Eske sala keteıik, búgin Qostanaı oblysynyń ákimi Qumar Aqsaqalov elordada 5 aıdaǵy áleýmettik-ekonomıkalyq damý jóninde esep berdi.