Bıyl Qostanaıda eńbekaqy kólemi 23% ósti

ASTANA. QazAqparat – Qostanaı oblysynyń ákimi Qumar Aqsaqalov óńirdiń 5 aıdaǵy áleýmettik-ekonomıkalyq damýy týraly esep berdi, dep habarlaıdy QazAqparat tilshisi.

«Jyl basynan beri qysqamerzimdi ekonomıkalyq ındıkator 3,4%, ortasha aılyq eńbekaqy 23% ósti. Negizgi kapıtalǵa ınvestıtsııalar kóleminiń 38,1%, óńdeý ónerkásibiniń – 21,8%, kóliktiń – 8,9%, qurylys jumystarynyń – 6,7%, aýyl sharýashylyǵyn – 4,1%, turǵyn úıdi paıdalanýǵa berý men saýdanyń 3,5% ósýi qamtamasyz etildi», – dedi Q. Aqsaqalov Ortalyq kommýnıkatsııalar qyzmetinde.

Ákimniń aıtýynsha, 1,5 jyl boıy Qostanaı oblysynda ónerkásip óndirisi kóleminiń tómendegeni baıqaldy.

«Qazir jaǵdaıdy turaqtandyryp, óndiris kólemin birtindep arttyryp kelemiz. Osylaısha, ónerkásip kólemi 2,6 paıyzǵa ulǵaıyp, 1,1 trln teńge boldy. Óńdeý ónerkásibinde óndiris kóleminiń ósýi mashına jasaý óndirisin 41%-ǵa, daıyn metall buıymdaryn 12,2%-ǵa, tamaq ónimderin 17,3%-ǵa, sýsyndar óndirisin 13,6%-ǵa ulǵaıtý esebinen qamtamasyz etildi. Jeńil jáne júk avtomobılderiniń, traktorlardyń, kombaındardyń, kondıterlik ónimderdiń, maı, et, sút, shujyq ónimderi men un óndirisi ulǵaıtyldy», – dedi Qumar Aqsaqalov.