Bıyl Qostanaı oblysyna 1700-ge jýyq adam kóship keledi
Oblystyq Jumyspen qamtýdy úılestirý jáne áleýmettik baǵdarlamalar basqarmasynyń málimetine súıensek, bıyl Qostanaı oblysynda eńbek resýrstaryn ońtaılandyrýdy kózdeıtin óńirlik kvotaǵa 1651 adam ilikken. Onyń ishinde 1 myńnan astamy qonys aýdarýshy, «Serpin» áleýmettik baǵdarlamasynyń 36 túlegi jáne shet elden oralǵan 350 qandasymyz bar.
«Qostanaıǵa qonys aýdarýshylardyń deni – Túrkistan, Jambyl, Qyzylorda, Almaty, Mańǵystaý oblystarynan. Al qandas aǵaıyndar Ózbekstan memleketinen keledi. Kóship kelýshi azamattarmen áleýmettik kelisimsharttar jasalýda. Kóshýge, turǵyn úıdi jalǵa alýǵa nemese satyp alýǵa sýbsıdııa tólenedi. Ekonomıkalyq belsendi degen qandastar men qonys aýdarýshylar jumysqa ornalastyrylady. Ótken jyly Qostanaı oblysynda 1700-ge jýyq qonys aýdarýshy men oralman turaqty oryn tapty», - dep málimet berdi basqarmadan.
Buǵan deıin shetelden elimizge kóship keletin qazaqtardyń qujattary, memleketten beriletin kómekter «bir tereze» qaǵıdatymen rásimdeletinin habarlaǵan bolatynbyz.