Bıyl kómirdiń baǵasy 30 paıyzǵa ósedi - Energetıka mınıstrligi

NUR-SULTAN. QazAqparat – Energetıka vıtse-mınıstri Jandos Nurmaǵanbetov bıyl elektr energııasyn óndirý qunyna áser etetin shyǵyndar artyp kele jatqanyn aıtty, dep habarlaıdy QazAqparat tilshisi.

«Mınıstrliktiń quzyretine energııa óndirýshi uıymdardyń elektr energııasyn óndirýge shekti tarıfterdi jeti jyldyq kezeńge bekitý máseleleri kiredi. Halyq jáne sońǵy tutynýshylar úshin tarıfterdi túzetýmen Ulttyq ekonomıka mınıstrligi aınalysady. Elektr energııasyna arnalǵan tarıfter «Elektr energetıkasy týraly» Zańǵa sáıkes 7 jylǵa belgilenedi. Bul rette energııa óndirýshi uıymdardyń elektr energııasyn óndirýge jumsaǵan shyǵyndary is júzinde ulǵaıǵan jaǵdaıda, olar shekti tarıfterdi túzetýge ýákiletti organǵa ótinim berýge quqyly. 2022 jyly shyǵyndardyń ulǵaıýy boljanyp otyr», - dedi Jandos Nurmaǵanbetov Ortalyq kommýnıkatsııalar qyzmetinde.

Osy oraıda ol «Bogatyr-Kómir» razrezinen kómir qunynyń ósýi eskerilgenin atap ótti. 2022 jylǵy 1 tamyzdan bastap 7 paıyzǵa ósýi, al 1 qyrkúıekten bastap taǵy 5 paıyzǵa artýy shyǵyndardyń kóbeıýine yqpal etedi.

«Jalpy, 2022 jyl ishinde kómirdiń quny 30 paıyzǵa artady. Temirjoldar boıynsha kómirdi jetkizý baǵasy jyl basynan beri Qazaqstan boıynsha ortasha eseppen 5 paıyzǵa ósti. Budan basqa, 2022 jylǵy 1 shildeden bastap taýar gazynyń quny energııa óndirýshi uıymdar úshin orta eseppen 15 paıyzǵa ósti», - dedi vıtse-mınıstr.

Budan buryn habarlanǵandaı, Jandos Nurmaǵanbetov Qazaqstannyń elektr energetıkasy salasyndaǵy eskirgen aktıvterdi jańartý kerek ekenin aıtty.