Bıyl qoljetimdi turǵyn úı qurylysynyń kólemi 3 ese artady - Altaı Kólginov

NUR-SULTAN. QazAqparat - Elorda ákimdiginde qoljetimdi jáne kommertsııalyq turǵyn úı, áleýmettik jáne mádenı nysandar qurylysy talqylandy, dep habarlaıdy QazAqparat qala ákimdiginiń resmı saıtyna silteme jasap.

Altaı Kólginov jetekshi qurylys kompanııalarynyń ókilderimen kezdesti. Kezdesýde qurylys salýshylar birqatar usynystaryn aıtty. Qala ákimdigi kóterilgen máselelerdi jumysqa aldy.

Elorda ákimi Altaı Kólginov qurylys jumystarynyń sapasyna tıisti kóńil bólý qajettigin atap ótti.

«Turǵyn úı men áleýmettik nysandardy salý - biz úshin basty mindet. Bul iste ákimdik barynsha qoldaý kórsetip keledi, kórsetedi de. Alaıda sizderdiń taraptan da barlyq qajetti talaptar oryndalýy tıis. Olardyń qataryna qurylys sapasy, jumys kezindegi qaýipsizdikti qamtamasyz etý, qyzmetkerlerge ýaqytyly jalaqy tóleý jatady. Memleket basshysynyń tapsyrmasyna sáıkes bıyl qoljetimdi turǵyn úı qurylysynyń kólemi úsh ese artady. Birlese qurylys qarqynyn arttyrýymyz qajet», - dedi qala ákimi Altaı Kólginov.

Elordada biryńǵaı dızaın-kod qabyldandy. Dızaın-kod stılıstıkalyq turǵyda biryńǵaı, jaıly ári qaýipsiz qalalyq ortany qalyptastyrý maqsatynda qabyldanǵan birqatar erejeler men usynymdardan turady. Dızaın-kod ǵımarattardyń qasbet elementterine jáne kóshe-jol keńistigine baǵyttalǵan.

Sondaı-aq, shaǵyn sáýlet nysandaryn, abattandyrýdy, árleý materıaldaryn qoldanýdy, tústik sheshimderdi, jarnamalyq qurylymdardyń mólsherin eskere otyryp, ǵımarattardyń qasbettik bóliginen kóshe-jol jelisiniń qazirgi jaǵdaıyn túzetý qarastyrylǵan.