Bıyl kolledjderge túsýge 180 myńnan astam talapker ótinish bergen

NUR-SULTAN. QazAqparat – Qazaqstanda kolledjderge túsýge 180 myńnan astam talapker qujat tapsyrǵan. Bul týraly Іnstagram jelisinde ótken tikeleı efır barysynda Oqý-aǵartý mınıstrliginiń Tehnıkalyq jáne kásiptik bilim departamentiniń basqarma basshysy Altaı Rahımberlın aıtty, dep habarlaıdy QazAqparat tilshisi.

«25 maýsymnan 25 tamyzǵa deıin kolledjge túsý úshin qujat qabyldaý jumystary júrgzildi. Nátıjesinde 180 myńnan astam ótinish tústi. Onyń ishinde 120 myńnan astam ótinish memlekettik bilim berý tapsyrysy negizinde qabyldandy», - dedi Altaı Rahımberlın.

Sonymen qatar ol kolledjderde qabyldaý emtıhandary alynyp tastalǵanyna toqtaldy.

«Tek medıtsınalyq jáne shyǵarmashylyq mamandyqtar boıynsha talapkerler arnaıy emtıhan tapsyrady. Jumys mamandyqtaryna talapkerlermen áńgimelesý qorytyndysy negizinde qabyldanady. Al qoldanbaly bakalavr mamandyqtaryna talapkerler attestattyń ortasha baly negizinde irikteledi», - dep atap ótti Tehnıkalyq jáne kásiptik bilim departamentiniń basqarma basshysy.

Eske salaıyq, buǵan deıin «Bilimdi ult» ulttyq jobasy aıasynda 2025 jylǵa deıin barlyq talapkerler úshin kolledjderde bilim alý tegin bolatynyn jazyp edik.