Bıyl kókónisterdi uzaq merzimge saqtaıtyn 29 qoıma salynady

ASTANA. QazAqparat – Aýyl sharýashylyǵy mınıstri Erbol Qarashókeev 2025 jylǵa deıin kókónis qoımalaryn salý jáne jańǵyrtý josparynyń aralyq nátıjelerin aıtty, dep habarlaıdy QazAqparat tilshisi.

Keshendi jospar aıasynda 2021-2022 jyldary jalpy saqtaý kólemi josparlanǵan 181,5 myń tonnanyń ornyna 200,8 myń tonnaǵa 37 joba atqarylǵan.

«Osylaısha josparlanǵan kórsetkishter 110 paıyzǵa oryndaldy. 2023 jyldyń sońyna deıin 111,5 myń tonna ónimge 29 jobany júzege asyrý josparlanǵan. Bul rette saqtaý qýattarymen qamtamasyz etý boıynsha naqty kórinisti belgileý úshin mınıstrlik Saýda jáne ıntegratsııa mınıstrligimen jáne oblys ákimdikterimen birlesip, sanattary boıynsha bólinip, barlyq qoımalarǵa tekserý júrgizedi. Tekserý qorytyndysymen 2023-2025 jyldarǵa arnalǵan jospar qaıta qaralady», - dedi E. Qarashókeev Úkimettiń búgingi otyrysynda.

Sonymen qatar, memlekettik qoldaýdy reformalaý jumysy sheńberinde ónimniń taýarlyq sıpatyn saqtaı otyryp, uzaq merzimge saqtaıtyn arnaıy jabdyqtary bar zamanaýı qoımalardy salý kezinde ınvestıtsııalyq salymdardy óteý úlesin 25%-dan 50%-ǵa deıin arttyrý jumystary júrip jatyr.

Buǵan deıin mınıstr kókónis baǵasynyń maýsymdyq qymbattaýyn boldyrmaý úshin saqtaý qoımalaryn kúsheıtý qajettigin aıtqan edi. Onyń aıtýynsha, Qazaqstan negizgi kókónistermen ishki naryqty tolyq qamtamasyz etip otyr.