Bıyl Kókaraldy saqtaýǵa bıýdjetten 1,2 mlrd teńge bólinedi

ASTANA. QazAqparat – Premer-Mınıstrdiń birinshi orynbasary Roman Sklıar Májilis depýtattarynyń saýalyna bergen jaýabynda Araldaǵy ekologııalyq jaǵdaıdy ońaltý jumystary týraly málimet berdi, dep habarlaıdy QazAqparat tilshisi.

«2022 jyldan bastap Kókaral bógetin saqtaý jáne Syrdarııa ózeniniń salasyn qalpyna keltirý jobasy qolǵa alynǵan. Jobanyń jalpy quny – 4 mlrd 582 mln teńge. 2022 jyly jobany iske asyrý úshin respýblıkalyq bıýdjetten 500 mln teńge bólinip, ıgerildi. Bul qarajatqa arna túzetin jáne ony qorshaıtyn bógetter ornatyldy. Sondaı-aq, «Qarashalań-1», Tuşy», «Sarytereń» sý aǵyzý kanaldaryn ekskovatormen tereńdetip arshý jumystary oryndaldy», - dep jazady Úkimet basshysynyń orynbasary.

Aıtýynsha, joba bıyl jalǵasyn tabady. Oǵan bıýdjetten tıisti qarjy da bólinip otyr.

«2023-2025 jyldardyń respýblıkalyq bıýdjeti aıasynda jobany jalǵastyrý úshin 4 mlrd 82 mln teńge qarastyrylǵan. (2023 jyly – 1 mlrd 200 mln teńge, 2024 jyly – 1 mlrd 623 mln teńge jáne 2025 jyly – 1 mlrd 258 mln teńge)», - deıdi Roman Sklıar.