Bıyl kıik sany 330 myńnan asýy múmkin

NUR-SULTAN. QazAqparat - Bıyl kıik sany 330 myńnan asýy tıis. Bul týraly Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet paraqshasynda jazdy, dep habarlaıdy QazAqparat.

«Mamyrdyń basynda bastalǵan kıikterdiń tóldeýi kúni keshe aıaqtaldy. Bıylǵy kóktem jaıma-shýaq, aqbókenderdiń esh ýaıymsyz tóldeýine yńǵaıly boldy. Betpaqdala, Oral jáne Ústirt popýlıatsııalarynda tóldeý ártúrli ýaqytta bastalsa da, birdeı kezeńde aıaqtaldy. Jez kıiktiń qorǵany bolǵan ınspektorlar ár oblysta saqtyq jumystaryn jiti júrgizdi. Dala kezgen «Ohotzooprom» jáne oblystyq aýmaqtyq orman sharýashylyǵy jáne janýarlar dúnıesi ınspektsııalardyń ınspektorlary kúndiz-túni tynym tappaı eńbek etti», - dep jazdy Sáken Dildahmet.

Onyń atap ótýinshe, tabıǵat saqshylary jas quralaılardyń ósip-ónýinen bastap, olardyń urpaq jalǵastyrýyna, bolashaqtyń amanatyn jetkizýi úshin jyl 12 aı qyzmet atqarady.

«Jazdy ótkizip, mızam týǵanda bıylǵy sanaqty ótkizemiz. Amandyq bolsa, byltyrǵy 334 myń mejeden asýymyz kerek», - dedi ol.

Foto: facebook.com/s.dildakhmet