Bıyl «Keńqııaq-Atyraý» munaı qubyry paıdalanýǵa beriledi

NUR-SULTAN. QazAqparat – Bıyl munaı ónimderin bırjalyq saýdaǵa kezeń-kezeńmen shyǵarý josparlanyp otyr. Bul týraly búgin Úkimet otyrysynda QR Energetıka mınıstri Nurlan Noǵaev aıtty, dep habarlaıdy QazAqparat tilshisi.

«2021 jyly otyn-energetıka kesheni kórsetkishterine qol jetkizý kelesi jobalar men bastamalar arqyly qamtamasyz etiledi. Qarashyǵanaq ken ornyn keńeıtý jobasynda gazdy keri aıdaý 4-shi kompressorynyń jobasy aıaqtalýda. Bul óz kezeginde suıyq ónimdi óndirýdi jylyna 11-12 mln tonna deńgeıinde ustap turýǵa múmkindik beredi», - dedi mınıstr.

Onyń atap ótýinshe, Pavlodar jáne Shymkent munaı óńdeý zaýyttaryn turaqty munaımen qamtamasyz etýge baǵyttalǵan, ótkizý múmkinshiligi jylyna 6 mln tonnaǵa deıin bolatyn «Keńqııaq-Atyraý» munaı qubyry reversi paıdalanýǵa beriledi.

«Sonymen qatar, bıyl munaı ónimderin bırjalyq saýdaǵa kezeń-kezeńmen shyǵarý josparlanýda, bul munaı ónimderine ádil jáne ashyq baǵa belgileýdi qamtamasyz etedi», - dedi Nurlan Noǵaev.