Bıyl qazan aıynda Ulttyq halyq sanaǵy ótedi

NUR-SULTAN. QazAqparat - Bıyl qazanda ótetin Ulttyq halyq sanaǵy eki kezeńnen turady. Bul týraly QR Ulttyq ekonomıka mınıstrligi Statıstıka komıtetiniń tóraǵasy Nurbolat Aıdapkelov aıtty, dep habarlaıdy QazAqparat tilshisi.

«2020 jyly Qazaqstan Respýblıkasynyń Ulttyq halyq sanaǵyn ótkizý ýaqyty men kezeńi

Halyq sanaǵy shartty eki kezeńnen turady. Daıyndyq kezeńi 1-30 maýsym aralyǵynda bolady. Bul kezeńde ıntervıýerler úılerdi aralap, onda turatyn turǵyndardyń naqty sanyn anyqtaıdy. Osy kezeńde sanaqty aýdandarǵa bólý daıyndyq júrgiziledi, - deıdi Nurbolat Aıdapkelov Ortalyq kommýnıkatsııalar qyzmetinde ótken baspasóz konferentsııasynda.

Ol sanaqty aýdandarǵa bólýdegen óńirdegi árbir eldi mekenniń aýmaǵyn sanaqty ótkizý úshin nusqaýshylyq jáne eseptik ýchaskelerge bólý ekenin aıtty.

Ekinshi, ıaǵnı negizgi kezeń 1-30 qazan aralyǵynda bolady. Qazan aıynyń 1 men 15 aralyǵynda, ıaǵnı tikeleı halyq sanaǵynyń alǵashqy 15 kúninde ınternet-saýalnama júrgiziledi. Internet-saýalnamada respondentter ózine jáne otbasy múshelerine Internet jelisi arqyly sanaq.gov.kz arnaıy saıtynda sanaq paraqtaryn óz betinshe toltyrady. Sonymen birge, saıtta respondentterge arnalǵan túsindirmeler men arnaıy vırtýaldy kómekshi de bar. Internet-saýalnamamen qatar 1-30 qazan aralyǵynda ıntervıýerler jappaı saýalnama júrgizedi. Saýalnama jaýaptary planshetke engiziledi. Internet arqyly málimetter bergen respondentter ıntervıýerler júrgizetin saýalnamaǵa qatyspaıdy. Halyqqa saýalnama júrgizý barysynda respondentti sáıkestendirý úshin suralatyn adamnyń JSN-i paıdalanylady. Saýalnama aıaqtalǵanda halyq sanaǵynan ótkeni týraly anyqtama beriledi», - deıdi ol.