Bıyl Qazaqstanǵa turaqty turýǵa keletin 12 myń qandasqa qolaıly jaǵdaı jasalady
Bul týraly Májilistegi «Nur Otan» partııasy parlamenttik fraktsııasynyń keńeıtilgen otyrysynda Úkimet basshysy Asqar Mamın aıtty, dep habarlaıdy QazAqparat tilshisi.
«Qoǵamdaǵy beıbitshilik pen kelisimdi nyǵaıtý jumysy jalǵasady. 2021 jyly Qazaqstanǵa turaqty turýǵa nıet tanytqan 12 myń qandasymyz úshin qolaıly jaǵdaı jasalyp, odan ary jyl saıyn 2 myń adamǵa arttyrý esebinen 2025 jylǵa qaraı 20 myń adamǵa jetkiziledi. «Rýhanı jańǵyrý» baǵdarlamasyn júzege asyrý jalǵasady», - dedi Úkimet basshysy «Nur Otan» partııasynyń «Ózgerister joly: ár azamatqa laıyqty ómir!» Saılaý baǵdarlamasyn oryndaýdyń Jol kartasyn talqylaý barysynda.
Premer-Mınıstrdiń aıtýynsha, 2021 jyly baǵdarlamany júzege asyrýǵa jumyldyrylǵan halyqtyń úlesi keminde 31 paıyzǵa jetip, 2025 jylǵa qaraı bul kórsetkish keminde 35 paıyzǵa artady.
«Barlyq dinderdiń ózara qurmeti men teńdigin qoldaýǵa baǵyttalǵan baǵdardy saqtaý maqsatynda jyl saıyn 10 suhbat alańy uıymdastyrylady», - dedi Asqar Mamın.