Bıyl qazaqstandyqtar Turǵyn úı qurylys jınaq banki jelisimen 10 myńǵa jýyq páter alady

ASTANA. QazAqparat - Elimizdegi 17 eldi mekenniń turǵyndary baǵasy qymbat emes, qoljetimdi turǵyn úıdiń ıesi atanbaq. Óńirlerdi damytýdyń 2020 jylǵa deıingi baǵdarlamasy iri megapolısterdi ǵana emes, elimizdiń oblys ortalyqtary men shaǵyn qalalaryn da qamtyǵan. Qurylystar ýaqytynda aıaqtalsa, Turǵyn úı qurylys jınaq banki jelisimen aýdany 570 myń sharshy metr bolatyn turǵyn úıler paıdalanýǵa berilýi tıis, dep habarlaıdy banktiń baspasóz qyzmetinen.

«Máselen, jergilikti ákimdiktermen arada qol qoıylǵan kelisim negizinde, «Halyqtyń barlyq sanatyna arnalǵan turǵyn úı» baǵytymen 6 906 páterdiń qurylysy aıaqtalýǵa jaqyn tur. Paıdalanýǵa berilgen turǵyn úı sany jóninen Almaty men Astana kósh bastap keledi. Dálirek aıtsaq, Almatyda - 1376 páter, al Astanada 994 páter óz ıelerin tapqan.

«Jas otbasyǵa arnalǵan turǵyn úı» baǵytymen bıyl 2 760 páter paıdalanýǵa berilýi tıis. Bul jerde de Elordamyz top jaryp tur - beriletin páterlerdiń sany 672. Ekinshi oryn Óskemenge tıesili. Bul jerde 435 otbasy páter kiltin alatyn bolady. Úshinshi oryn Shymkent pen Qaraǵandy shaharlarynyń enshisine tıip otyr. Bul qalalardyń árqaısysy 216 páterdi paıdalanýǵa bermek.

Bıyl alǵashqylardyń biri bolyp Aqtaý qalasynyń turǵyndary qonys toıyn toılady. 400 otbasyna «Qoljetimdi baspana - 2020» baǵdarlamasy boıynsha Turǵyn úı qurylys jınaq banki jelisimen salynǵan páterlerdiń kilti tabys etildi. Budan bólek, Mańǵystaý oblysynda osy jyldyń sońyna qaraı biri - 120 páterli, biri - 670 páterli eki úıdiń qurylys aıaqtalmaq. Bul páterlerge QTQJB jelisimen Baǵdarlamaǵa qatysýshylardyń ıe bolatyny túsinikti.

Bank baǵytymen qoljetimdi turǵyn úı qurylysynyń der kezinde aıaqtalýy úshin, 2015 jyly Ulttyq qordan qosymsha 30 mıllıard teńge bólindi.

Turǵyn úı qurylys jınaq banki turǵyn úı qurylys jınaq júıesiniń qarjysyn da utymdy paıdalanyp keledi. Bul memleket bıýdjetine túsetin salmaqty edáýir azaıtty. Aıtalyq, «Qoljetimdi baspana - 2020» baǵdarlamasymen salynǵan úılerdiń óteýi retinde, bank bıýdjetke 60 mıllıard teńgeni merziminen buryn qaıtaryp berdi. Bıyl taǵy da 30 mıllıard teńgeni qaıtarýdy josparlap otyr», - dep jazylǵan habarlamada.

Aıta ketetin jaıt, «Qazaqstannyń turǵyn úı qurylys jınaq banki» AQ - «Báıterek» Ulttyq basqarýshy holdıngi» AQ-nyń enshiles kompanııasy.