Bıyl Qazaqstanda zańsyz aǵash kesýdiń 100-den astam faktisi anyqtaldy

NUR-SULTAN. QazAqparat – Bıyl elimizde orman aǵashyn zańsyz kesýdiń 111 faktisi tirkeldi. Bul týraly QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıteti tóraǵasynyń mindetin atqarýshy Erlan Qutpanbaev málim etti, dep habarlaıdy QazAqparat tilshisi.

«Bizde Aqparat jáne qoǵamdyq damý mınıstrligimen birlesip qurylǵan aqparattyq geojúıe bar. Ol 4 baǵytta jumys isteıdi. Birinshi – orman aǵashtaryn zańsyz kesýden qorǵaý, ekinshi – ormanda bolýy múmkin órttiń aldyn alý, úshinshi – ormanda zańsyz qurylys salýǵa jol bermeý jáne tórtinshi baǵyt – ormandy damytý, ıaǵnı ondaǵy aǵash sandaryn kóbeıtý», - dedi Erlan Qutpanbaev Ortalyq kommýnıkatsııalar qyzmetinde ótken baspasóz máslıhatynda.

«Bıyl elimizde zańsyz aǵash kesýdiń 111 faktisi tirkeldi. Kesilgen aǵashtyń kólemi 5 myń tekshe metrdi quraıdy. Osy sebepten keltirilgen zalaldyń kólemi 97 mln teńgeni qurap otyr. Bul faktilerdi bizdiń ınspektorlar anyqtady. Osy oraıda aıta ketkim keledi, 1 jeltoqsannan bastap qylqan japyraqty ormandardy qorǵaýǵa arnalǵan respýblıkalyq aktsııa júrip jatyr. Jalpy ormandy qorǵaý jáne damytý jumysy ár mekeme, qoryq jáne memlekettik organdarmen birlesip júrip jatyr», - deıdi ol.

Buǵan deıin habarlaǵanymyzdaı bıyl elimizde 130 mln túp aǵash otyrǵyzyldy. Ol úshin respýblıkalyq jáne jergilikti bıýdjetten barlyǵy 12 mlrd teńge bólindi.

Aıta ketsek, Memleket basshysy ótken jylǵy Joldaýynda 2025 jylǵa deıin elimizdiń ormandy aýmaǵynda 2 mlrd túp aǵash otyrǵyzý mindetin júktegen edi.