Bıyl Qazaqstanda shamamen 10 mln. sharshy metr baspana paıdalanýǵa beriledi
Bul týraly búgin Úkimet otyrysynda QR Ulttyq ekonomıka mınıstri Qýandyq Bıshimbaev málim etti, dep habarlaıdy «QazAqparat» HAA tilshisi.
«2016 jyldyń qorytyndysyna arnalǵan boljamdy derekterge sáıkes, 9,6 mln. sharshy metr turǵyn úı paıdalanýǵa beriletin bolady. 2009 jyldan bastap halyqtyń turǵyn úımen qamtamasyz etilýi 14,8 paıyzǵa artyp, ótken jyly 21 sharshy metrdi qurady», - dep atap ótti mınıstr.
Osy rette ol Memleket basshysynyń tapsyrmasymen «Nurly jer» memlekettik baǵdarlamasynyń tujyrymdamasy ázirlengenin, onyń maqsaty turǵyn úı qurylysy salasyndaǵy barlyq resýrstardy bir baǵdarlamaǵa shoǵyrlandyrý bolyp tabylatyndyǵyn atap ótti.
«Tujyrymdamanyń basym baǵyttary mynalar: Birinshi, ıpotekalyq qaryzdardy sýbsıdııalaý arqyly ıpotekalyq nesıe berýdi qoldaý; Ekinshi, qurylys kompanııalary úshin qaryzdardy jabý jolymen jeke qurylys salýshylardy yntalandyrý; Úshinshi, Turǵyn úı qurylys jınaq bankiniń salymshylary jáne ákimdikterde kezekte turǵan azamattar úshin «revolverlik» qaǵıdat boıynsha kredıttik turǵyn úı qurylysynyń kólemin ulǵaıtý; Tórtinshi, halyqtyń áleýmettik jaǵynan osal toptary úshin satyp alý quqyǵynsyz jalǵa beriletin turǵyn úıdiń óńirlik qoryn qurý; Baǵdarlamanyń sońǵy baǵyty, memlekettiń jer ýchaskelerin berýi arqyly jeke turǵyn úı qurylysyn damytý», - dedi Bıshimbaev.
Onyń atap ótýinshe, ıpotekalyq kredıt berý naryǵyn jandandyrý maqsatynda azamattarǵa ekinshi deńgeıdegi bankter beretin ıpotekanyń protsenttik stavkasynyń bir bóligin memlekettiń sýbsıdııalaýy arqyly halyqtyń suranysyn yntalandyrý kózdelip otyr. Banktiń syıaqy stavkasy jylyna 17 paıyzdan artyq bolmaıdy jáne 7 jyl ishinde sýbsıdııalaý boljanady.
«Túpkilikti qaryz alýshynyń ıpotekasyn 10 paıyzǵa deıin tómendetý úshin memleket syıaqy qunynyń 7 paıyzyna deıin jabýdy qamtamasyz etetin bolady. Búgingi kúni osy maqsatqa 2017 jylǵa arnalǵan respýblıkalyq bıýdjette 10 mlrd. teńge kózdelgen, bul 120 mlrd. teńge somasynda jeńildikti ıpotekalyq qaryz berýge múmkindik beredi», - dedi mınıstr.