Bıyl Qazaqstanda munaı óndirý kólemi boıynsha jospar oryndalmaýy múmkin

ASTANA. QazAqparat - Energetıka vıtse-mınıstri Ashat Hasenov bıyl Qazaqstanda munaı óndirý kólemi birshama azaıýy múmkin ekenin aıtty, dep habarlaıdy QazAqparat tilshisi.

«Óndirý baǵytynda birshama túzetý engizilýi múmkin. Jyl sońyna deıingi jospar boıynsha 90,5 mln tonna munaı óndirý qarastyrylǵan. Bıylǵy 8 aıdyń qorytyndysyna qarasaq, josparly deńgeıge jetpeı jatyrmyz. Alaıda jyl sońyna qaraı belgilengen kórsetkishke jetýge tyrysamyz», - dedi A. Hasenov Májiliste tilshiler suraǵyna jaýap bere otyryp.

Onyń paıymynsha, 90 mln tonna deńgeıindegi jospar oryndalmasa da, shamamen 89 mln tonna munaı óndirilýi múmkin.

«Elimizdegi iri jobalar boıynsha tıisti tehnıkalyq jumystar atqarylyp jatyr. Olar bul is-sharalardy tez arada aıaqtasa, onda munaı óndirý kólemi artady. Jalpy, bıyl 90,5 mln tonna óndirý kerekpiz, biraq bul kórsetkish sál azaıýy yqtımal», - dedi vıtse-mınıstr.

Budan buryn habarlanǵandaı, jaqynda Qarashyǵanaqta munaı men gaz kondensatyn óndirý kólemi qysqardy.

Energetıka mınıstrliginiń málimetinshe, 2023 jylǵa arnalǵan munaı óndirý jospary – 90,5 mln tonna, al eksport kólemi – 71 mln tonna.