Bıyl Qazaqstanda 500 shaqyrym joldyń qurylysy aıaqtalady - Úkimet basshysy

ASTANA. QazAqparat - Bıyl Qazaqstanda «Nurly jol» memlekettik baǵdarlamasy aıasynda 500 shaqyrymdyq joldyń qurylysy aıaqtalady. Bul týraly Prezıdent Nursultan Nazarbaevtyń qatysýymen ótip jatqan Úkimettiń keńeıtilgen májilisinde baıandama jasaǵan QR Premer-Mınıstri Baqytjan Saǵyntaev málim etti, dep habarlaıdy «QazAqparat» HAA tilshisi.

«Kóliktik, ındýstrııalyq jáne áleýmettik ınfraqurylymdardyń aýqymdy qurylysynyń arqasynda jyl saıyn 100 myńǵa jýyq jumys oryndary ashylýda. Eń aldymen, avtokólik joldarynyń zamanaýı jelisi týraly aıtyp ótsem. 2015-2017 jyldary Astanany basqa óńirlermen baılanystyrǵan  2 myń shaqyrym avtomagıstral salyndy. 4 myń shaqyrymǵa jýyq jolǵa kúrdeli jóndeý júrgizildi», - dedi Úkimet basshysy

Baqytjan Saǵyntaevtyń aıtýynsha, atalmysh baǵdarlama aıasynda qarqyndy jumys jalǵasa bermek.

«2018 jyly 500 shaqyrym joldyń qurylysy aıaqtalady. Sizdiń Joldaýyńyzdaǵy mindetterge saı, aldaǵy ýaqytta jergilikti joldarǵa basa mańyz beretin bolamyz. Olardyń qurylysy úshin 150 mlrd teńge bólinip, bul qadam aýyldar men qalalardaǵy ómir sapasyn arttyrady», - deıdi Premer-Mınıstr.

Eske sala ketsek, Búgin Qazaqstan Prezıdenti Nursultan Nazarbaevtyń tóraǵalymen el Úkimetiniń keńeıtilgen májilisi ótip jatyr. Otyrys barysynda elimizdiń 2017 jylǵy áleýmettik-ekonomıkalyq damý qorytyndylary shyǵarylyp, aldaǵy ýaqytta ekonomıkalyq ósimdi qamtamasyz etý jónindegi sharalar aıqyndalady dep kútilýde.