Bıyl Qazaqstanda 20,5 myń shaqyrym elektr jelisi jóndeledi

NUR-SULTAN. QazAqparat – 2021 jyly respýblıka boıynsha jalpy uzyndyǵy 20 458 shaqyrym bolatyn elektr jelisi, 441 qosalqy stansa, 4315 taratý pýnkti men transformatorlyq stantsııa kúrdeli jóndeýden ótedi, dep habarlaıdy QazAqparat tilshisi.

Úkimet otyrysynda jylytý maýsymyna daıyndyq sharalary týraly baıandaǵan Energetıka mınıstri Nurlan Noǵaev osyndaı málimet berdi.

«Júıelik operator bekitken elektr stantsııalarynyń negizgi jabdyqtaryn jóndeý kestesine sáıkes aǵymdaǵy jyly 8 energoblokty, 48 qazandyqty jáne 49 týrbınany jóndeý josparlanǵan. Túrli kezeńderde 4 energoblokta, 13 týrbınada jáne 15 qazandyqta jóndeý jumystary júrgizilýde. Jóndeý jumystary 4 qazanda aıaqtalady», -dedi mınıstr.

Nurlan Noǵaevtyń sózine qaraǵanda, bıyl jalpy uzyndyǵy 20 458 km elektr berý jelilerin, 441 – qosalqy stantsııalardy, 4315 – taratý pýnktteri men transformatorlyq qosalqy stantsııalardy kúrdeli jóndeý josparlanǵan.