Bıyl Qazaqstan munaıy Ázerbaıjan arqyly tasymaldanady – Roman Vasılenko

ASTANA. QazAqparat – BAQ ókilderiniń qatysýymen ótken brıfıngte Syrtqy ister mınıstriniń orynbasary Roman Vasılenko bıyl «Aqtaý-Baký» baǵytynda munaı tasymaldaý iske qosylatynyn aıtty, dep habarlaıdy QazAqparat tilshisi.

Mınıstrdiń orynbasary Qazaqstan óz aýmaǵy arqyly ótetin barlyq baǵyttaǵy tranzıtke shekteý qoımaıtynyn málim etti.

«Búginde tek «Shyǵys-Batys» qana emes, «Soltústik-Ońtústik» baǵyty da bar. Osyǵan deıin orta baǵyt aıtyldy. Biraq ońtústik baǵyt ta bar. Ol Túrikmenstan men Iran arqyly ótedi. Byltyr prezıdent Iranǵa baryp, taýardy Túrkııa arqyly sol elge jiberý boıynsha kelisimder júrgizdi», - dedi Roman Vasılenko.

Onyń aıtýynsha, qazir munaı eksporty birneshe mańyzdy baǵyt boıynsha jolǵa qoıylǵan.

«Onyń ishine Reseı arqyly ótetin baǵyttar kiredi. Kaspıı qubyr konsortsıýmy, «Atyraý-Samara» qubyry, «Mahachkala-Aqtaý» baǵyttary bar. Bıyldan bastap «Aqtaý-Baký» baǵytyndaǵy tasymaldaý iske qosylady. ıAǵnı, munaı Ázerbaıjan arqyly tasymaldanady», - dep túsindirdi ol.