Bıyl Qazaqstan Mońǵolııaǵa 28 mln dollardyń taýaryn eksporttady
Qazaqstan - Mońǵolııaǵa temeki ónimderi men raps tuqymyn jetkizýshi basty elderdiń biri. Tek 2017 jyldyń ózinde osy elge 25 mln AQSh dollarynan astam somaǵa taýar jetkizdi.
Endi mońǵolııalyq kompanııalar Qazaqstannan aýylsharýashylyq ónimderin, kondıterlik buıymdardy jáne qurylys materıaldaryn ımporttaýǵa qyzyǵýshylyq tanytyp otyr. Bul týraly taraptar qazannyń basynda Ulan-Batorda ótken elimizdiń saýda-ekonomıkalyq mıssııasy barysynda ýaǵdalasty. Mıssııany uıymdastyrýshylar QR Investıtsııa jáne damý mınıstrligi, Mońǵolııadaǵy Qazaqstannyń Elshiligi, «Atameken» UKP, Qazaqstannyń Syrtqy saýda palatasy jáne Mońǵolııanyń Ulttyq saýda-ónerkásip palatasy bolyp tabylady.
Qazaqstandyq delegatsııa negizinen tamaq ónerkásibi ókilderinen, atap aıtqanda, kondıterlik buıymdardy jáne maı ónimderin, sondaı-aq qurylys ındýstrııasyn óndirýshilerden quraldy. Mońǵolııa tarapynan 40-tan astam kompanııa qatysty.
Qazaqstannyń Syrtqy saýda palatasy basqarma tóraǵasynyń orynbasary Nuraly Bókeıhanov mıssııaǵa qatysýshylarǵa sálem joldaı otyryp, eki eldiń arasyndaǵy ekonomıkalyq yntymaqtastyq edáýir tyǵyz baılanystarǵa ulasqanyn atap ótti.
«Mońǵolııa - ekonomıkasy damýshy el bola otyryp, ınfraqurylym, energetıka, sondaı-aq bilim men mádenıet salalaryndaǵy ekijaqty yntymaqtastyqty damytýda zor perspektıvaǵa ıe. Qos el arasyndaǵy saýda-sattyq baılanysy nyǵaıa túsýde. Kásipkerlik qoǵamdastyq túrli salalardaǵy burynnan kele jatqan jáne jańa baılanystardy nyǵaıtyp jatyr», - dedi N. Bókeıhanov.
Eki el arasyndaǵy taýar aınalymy 2017 jyly 74,8 mln AQSh dollaryn qurady, onyń ishinde 72,5 mln dollar - Qazaqstannyń Mońǵolııaǵa eksporty. Bıylǵy jyldyń bes aıynda taýar aınalymy 28,8 mln dollarǵa jetti, onyń ishinde eksport 28 mln dollar. Temeki men raps tuqymynan basqa Qazaqstan Mońǵolııaǵa un ónimderin, gıgıenalyq jáne jýý quraldaryn jetkizedi.
«Qazaqstannyń Syrtqy saýda palatasy eki eldiń kásipkerlik qoǵamdastyqtarynyń arasyndaǵy yntymaqtastyqty damytý úshin kelissózderge arnalǵan alań usyna otyryp, osyndaı is-sharalardy uıymdastyrady. Sondaı-aq biz mońǵoldyq bıznesmenderge Qazaqstan aýmaǵyndaǵy barlyq salalar boıynsha senimdi ári adal nıetti seriktester tabýǵa kómek kórsete alamyz», - dedi N. Bókeıhanov kezdesý ıelerine qarata aıtqan sózinde.
Mıssııa barysynda eki eldiń bıznes qoǵamdastyqtary ınvestıtsııa, logıstıka jáne saýda salalaryndaǵy ekijaqty yntymaqtastyqtyń perspektıvalyq máselelerin talqylady.
Shara barysynda «Baıan Sulý» jáne «Eurasian Foods Corporation» kompanııalary kondıterlik jáne maı ónimderin jetkizý týraly dıstrıbıýtorlyq kelisim jasady.