Bıyl Qazaqstan aýyldarynyń 92% aýyz sýmen qamtamasyz etiledi

NUR-SULTAN. QazAqparat - 2025 jylǵa qaraı memleket halyqty sýmen jabdyqtaý qyzmetterimen 100% qamtamasyz etýi tıis. Bul 2020-2025 jyldarǵa arnalǵan «Nurly jer» memlekettik baǵdarlamasynyń baǵyttarynyń biri.

QR Indýstrııa jáne ınfraqurylymdyq damý mınıtrligi taratqan málimetterg e qaraǵanda, 3 óńirde, atap aıtqanda Soltústik Qazaqstan, Mańǵystaý jáne Atyraý oblystarynda qala halqynyń 100% ortalyqtandyrylǵan sýmen qamtamasyz etilgen.

Aýyldyq jerlerde sýmen jabdyqtaýdyń eń kóp qamtylýy Almaty (98,3%), Atyraý (98,5%) jáne Qyzylorda (97,6%) oblystarynda baıqalady.

Elimizdiń keıbir óńirleri bul baǵyt boıynsha artta qalǵan. Aýyz sýmen qamtýdyń eń tómen deńgeıi Qostanaı (64,7%), Jambyl (82,2%) jáne Pavlodar (88,4%) oblystarynyń aýyldarynda baıqalady.

Aǵymdaǵy jyly sýmen jabdyqtaýdyń sapaly qyzmetterimen qamtamasyz etý úshin 151,4 mlrd. teńge kózdelgen.

2021 jyldyń qorytyndysy boıynsha 200 myńǵa jýyq Qazaqstan turǵynyn sapaly sýmen qamtamasyz etý qosymsha josparlanýda, bul jalpy 17,86 mln. adamdy nemese respýblıkanyń barlyq halqynyń 95% - yn quraıdy, onyń ishinde: qalalarda – 98%, aýyldarda-92%.