Bıyl Qazaqstan 6,5 mln tonnaǵa deıin astyq eksporttaıdy

NUR-SULTAN. QazAqparat – Bıyl elimizdiń qansha kólemde astyqty eksportqa jiberetini belgili boldy, dep habarlaıdy QazAqparat tilshisi.

«Bıyl josparǵa saı 6-6,5 mln tonna astyqty eksporttaýǵa jaǵdaıymyz bar. Buǵan deıin aıtqanymdaı, búginde elimiz boıynsha 16 mln tonna astyq bastyrylsa, onyń 7 mln-y ishki naryqty qamtamasyz etedi. Astyq eksporty burynǵysynsha, Ortalyq Azııa, Aýǵanstan, Iran eline jasalady. Sonymen qatar qatty dándi daqyldardy keıbir Eýropa elderine eksporttaýdy josparlap otyrmyz», - dedi QR Aýyl sharýashylyǵy mınıstriniń birinshi orynbasary Aıdarbek Saparov OKQ-de ótken baspasóz máslıhatynda.

Odan bólek, vıtse-mınıstr bıyl qýańshylyq jaılaǵan Mańǵystaý fermerlerin jemshóppen qamtýǵa qatysty pikir bildirdi.

«Jospar boıynsha Mańǵystaý oblysyna 77 myń tonna jemshóp jınaý kerek, búginde onyń 65 paıyzy daıyndaldy. Ol úshin memlekettik bıýdjetten 1,9 mlrd teńge qarjy bólingen. Qazirgi ýaqytta basqa oblystarmen shart jasasyp, jemshóp jetkizilip jatyr. Jemshóppen qamtýdy 100 paıyz qamtamasyz etemiz dep oılaımyn», - deıdi ol.

Buǵan deıin Aıdarbek Saparov egistik alqapty kıikter taptap tastaýynan shyǵynǵa batqan otandyq fermerlerdiń janaıqaıyna jaýap bergen edi.