Bıyl Qazaqstan 5,7 trln teńge qaryz alady

ASTANA. QazAqparat – QR Premer-Mınıstri Álıhan Smaıylov Qarjy mınıstrliginiń keńeıtilgen alqa májilisinde bıýdjet tapshylyǵyn joıýǵa alynatyn qaryzdy qandaı kózderden tartý qajettigin aıtty, dep habarlaıdy QazAqparat tilshisi.

«Bıýdjet tapshylyǵyn jabý men memlekettik qaryzǵa qyzmet kórsetý úshin qarajat tartý da mańyzdy másele. Bıyl bıýdjet tapshylyǵynyń JІÓ-ge qatynasy 2,7% nemese 3,2 trln teńge boldy.

Buryn tartylǵan qaryzdardy óteý qajettiligin eskersek, qaryz alý qajettiligi 5,7 trln teńgeni quraıdy. Bul qomaqty soma», - dedi Álıhan Smaıylov.

Úkimet basshysy bul baǵyttaǵy qaryzdyń negizgi bóligi teńgemen jáne ishki naryqtan alynýy kerektigin eskertti.

«Tapshylyqty negizinen ulttyq valıýtadaǵy Іshki qaryz alý arqyly qarjylandyrý qajet. Osylaısha biz valıýtalyq táýekelderdi teńestiremiz jáne ishki naryqty damytamyz.

Osyǵan qaramastan, bıýdjet tapshylyǵyn qarjylandyrý úshin qarajat tartýdyń barlyq áleýetin, onyń ishinde syrtqy naryqtarǵa shyǵýdy paıdalaný qajet.

Osy baǵyttaǵy jumys bıýdjetti atqarý kezinde kassalyq alshaqtyqtar bolmaıtyndaı, al barlyq boryshtyq ındıkatorlar qaýipsiz deńgeıde bolatyndaı etip qurylýy tıis», - dedi Premer-Mınıstr.