Bıyl qaı oblysta jer ýchaskeleri kóptep beriledi

ASTANA. QazAqparat - Úkimettiń búgingi otyrysynda QR Investıtsııalar jáne damý mınıstri Jeńis Qasymbek «Nurly jer» memlekettik baǵdarlamasy aıasynda jer ýchaskelerine ınjenerlik jelilerdi tartý kórsetkishterin jarııalady. Dál osy jelilerliń tartylýyna qaraı jeke turǵyn úıdi salý úshin jer ýchaskeleri beriledi, dep xabarlaıdy QazAqparat tilshisi.

«Jer ýchaskelerine ınjenerlik jelilerdi tartý jaǵynan eki oblys biraz jumysty atqaryp shyqpaqshy. Máselen, Mańǵystaý oblysy 15 myń jer ýchaskesin daıyn qylsa, Aqtóbe oblysy 11 myń jer ýchaskesin beremiz dep otyr», - deıdi Qasymbek. Mınıstrdiń aıtýynsha, jalpy respýblıka boıynsha alty aıdyń ishinde 23,5 jer ýchaskesine ınjenerlik jeliler tartyldy. Bıyl jeke turǵyn úıge qajetti jer ýchaskeleriniń eń az sany Qostanaı (820), Shyǵys Qazaqstan (854) men Pavlodar (413) oblystarynda bolady.

Aıta ketken jón, aǵymdaǵy jylda 60 myń ýchaskesine ınjenerlik jelilerdi tartý josparlanǵan. Osy sharalarǵa 45,5 mlrd teńge qarastyrylǵan.

Budan bólek, «Nurly jer» baǵdarlamasynyń dál osy baǵyty boıynsha kottedj qalashyqtaryn salý jumysy bastaldy. Baspana bıýdjet qarjysyna salynady. Ony turǵyn úı jınaq júıesi arqyly satyp alýǵa múmkindik bar. Pılottyq joba aıasynda tórt oblysta 1 193 kottedji turǵyzý josparlanyp otyr.