Bıyl Qarýly kúshterge áskerı kafedralardyń túlekteri jappaı shaqyrtylady

ASTANA. QazAqparat - Bıyl ýnıversıtetter janyndaǵy áskerı kafedralarda bilim alǵan túlekter Qarýly kúshter qataryna shaqyrtylady. Bul týraly Májilistegi Úkimet saǵatynda QR Qorǵanys mınıstri Sáken Jasuzaqov málim etti, dep  habarlaıdy QazAqparat.

«Áskerı bilim alǵan rezervke erekshe nazar aýdarylyp otyr. Azamattyq joǵary oqý oryndarynyń janyndaǵy 29 áskerı kafedralarda tirkelgen 70 mamandyq boıynsha daıyndyq júrip jatyr. Jyl saıyn áskerı kafedralardan 3 700-den astam zapastaǵy ofıtserler túlep shyǵady. Biz búginde qaıta baǵdarlaý sharalaryn júrgizip, birqatar kafedralarda qazirgi zamanǵy mamandyqtarǵa mán berip otyrmyz. Osy oraıda olar ІT-tehnololgııa, aqparattyq qaýipsizdik mamandyqtaryna baǵyt aldy. Meniń oıymsha, bul mamandar suranysqa ıe bolady. Aǵymdaǵy jyly áskerı kafedralardyń túlekterin erikti negizde kelisimshart boıynsha Qarýly Kúshter qataryna shaqyrýdy tapsyrdym»,-dedi mınıstr.

Onyń sózine qaraǵanda, bul turǵyda JOO-lar janyndaǵy áskerı kafedralar túlekteriniń bilimi tekseristen ótetin bolady.

«Bizde áskerı dirigerler, artıllerıster men baılanys mamandary boıynsha birshama tapshylyq bar»,-dedi Jasuzaqov.

Onyń sózine qaraǵanda, Qarýly kúshterdegi mamandyqtardyń barlyq túrleri QR Qorǵanys mınıstrliginiń úsh áskerı oqý ornynda daıarlaıdy. Jyl saıyn áskerı ınstıtýttar 650 ofıtserdi oqytyp shyǵarady. Tehnıkalyq jáne kásibı bilimdi Kadet korpýsy qamtamasyz etedi.