Bıyl Qaraǵandyda 72 shaqyrym jol jóndeledi

QARAǴANDY. QazAqparat – Qaraǵandyda jaz sońyna deıin 72 shaqyrym jol tósemin jóndeý josparlanyp otyr. Bıyl basty nazar jeke sektordyń qara joldaryn asfalttaýǵa aýdarylady. Mıhaılovka, Berlın kenti, Fedorovka jáne qalanyń basqa bólikterindegi 50 kóshede asfalt tóseledi, dep habarlaıdy QazAqparat tilshisi.

Jol jóndeý boıynsha eń úlken joba – Ǵaryshkerler kóshesin qaıta qurý. Ol eki jylǵa eseptelgen. Jumystar Buqar jyraý dańǵylynan Vavılov kóshesine deıingi aralyqta bastaldy. "Kvintec construction" JShS merdiger kompanııasy Vysokovoltnaıa kóshesine deıingi joldy tórt jolaqqa deıin keńeıtýi tıis.

«Joba tek joldy qaıta qurýdy ǵana emes, sonymen qatar nóserli kárizdi salýdy da kózdeıdi. Qazir asfalt tóseýge shamamen 300 metr daıyn. Biz joldy bólikterge bólemiz. Bıyl shamamen 1,2 shaqyrymdy aıaqtaýdy josparlap otyrmyz. Joldyń uzyndyǵy shamamen 3,7 shaqyrym. Biz munda reseılik bıtýmdy qoldanamyz, ol joǵary sapaly. Qaıta jóndeý kepildigi – bes jyl. Bizdiń kompanııa naryqta 20 jyl jumys istep keledi. Jumystyń sapaly jurgiziletinine ýáde beremiz», – deıdi «Kvintec construction» JShS joba jetekshisi Gevorg Sogoıan.

Sondaı-aq, Ǵaryshkerler kóshesin qaıta qurý jobasy tehnıkalyq trotýarlardy jaılastyrýdy jáne jaryqtandyrý tirekterin aýystyrýdy kózdeıdi. Nóser arnalarynyń boıynda avtonomdy tazartý ınjenerlik qurylystary – NTQ ornatylady. Jańa nóseraǵarlar Vavılov kóshesinde, sondaı-aq Neftebaza aımaǵynda salynady. Qurmanǵazy, Orsk jáne Reznık kóshelerinde 15 km nóser kárizin salý jeke aýlalardy erigen qar sýy basý máselesin sheshýge múmkindik beredi.

«Biz Buqar jyraý dańǵylyn – 16-shy dúkennen K.Dúısembekov kóshesine deıin ortasha jóndeýge kiristik. Ótken jyly ol bólikte shuńqyrlar jóndeldi. Kóktemde kóptegen shaǵym tústi. 17 maýsymnan bastap dúısenbige deıin biz bul jol ýchaskesin tolyǵymen jabamyz. Onda asfalttyń joǵarǵy qabatyna ShMA salynady. Qolaısyzdyq úshin turǵyndardan aldyn ala keshirim suraımyz. Buqar jyraý boıynsha taǵy eki ýchaskeni – Ermekovten N.Ábdirov dańǵylyna deıin jáne Nazarbaevtan Chkalov kóshesine deıin qamtýdy josparlap otyrmyz», – deıdi Qaraǵandy TKSh bólimi basshysynyń m. a. Grıgorıı Botnar.

Sonymen qatar, qalada Respýblıka dańǵyly (Gýdermesskaıa kóshesi – K.Dúısembekov kóshesi), Shahterler (Táttimbet kóshesi – Respýblıka dańǵyly), N.Ábdirov (Gogol kóshesinen Nazarbaev dańǵylyna deıingi kishi jolaǵy) jáne Gýdermesskaıa, Solnechnaıa, Álıhanov kóshelerindegi avtojoldardy ortasha jóndeý josparlanǵan.

Habarlanǵandaı, bıyl Qaraǵanózek (Úlken Mıhaılovka) stantsııasyndaǵy

temirjoldyń ústinen jaıaý júrginshiler kópiri salynady.