Bıyl Qaraǵandy oblysynda 165 jańa avtobýs satyp alynady

QARAǴANDY. QazAqparat – Bıyl Qaraǵandy oblysynda 165 jańa avtobýs satyp alý josparlanyp otyr. Onyń 33-i qanattas qalalar arasyna qatynaıdy. Ótken jyly tasymaldaýshy kompaııalar qoǵamdyq kólikterin aıtarlyqtaı jańartqan bolatyn, dep habarlaıdy QazAqparat tilshisi.

Aýdanaralyq baǵyttarǵa júretin avtobýstardyń tozyǵy jetken. Avtoparkterdegi kólikterdiń basym bóligi 12 jáne 14 jyl buryn alynǵan.

Qaıta jańǵyrtý maqsatynda ótken jyly tasymaldaýshy kompanııalar 69 jańa avtobýs satyp aldy.

Jolaýshylardyń qaýipsizdigi men tasymal sapasyn arttyrý úshin birshama ister qolǵa alynǵan. Osy jyly ol úrdis jalǵasady.

«Jalpy oblys boıynsha jolaýshylardy tasymaldaý 203 turaqty marshrýttarmen júzege asyrylýda. 954 avtobýspen 39 tasymaldaý qyzmeti kórsetiledi. Aýdanaaralyq tasymaldaý salasynda 30 marshrýttyń qozǵalysy uıymdastyrylǵan. 111 avtobýspen 14 tasymaldaýshy jumys isteıdi», - dep málimdedi Qaraǵandy oblystyq jolaýshylar kóligi jáne avtomobıl joldary basqarmasy basshysynyń orynbasary Mergen Muqyshev.

Osy jyly qoǵamdyq kólikterde ONAY! elektrondy bılet júıesi engizilgen.

Ol Qaraǵandydan Temirtaý, Shahtınsk, Saran, Abaı qalalaryna, sondaı-aq Shahan jáne Topar kentterine baratyn baǵyttardy qamtydy.

Jolaqy tóleýdiń elektrondy júıesiniń arqasynda jolaýshylar aǵynynyń sany kúnine 16 myńnan 33 myń adamǵa deıin 2 ese artty.

Qolma-qol aqshasyz tólem júrgizý 92% qurady.

Aımaqtyń tasymal júıesinde temirjol kóligi de mańyzdy ról atqarady. Qazir 7 áleýmettik mańyzy bar temirjol qatynasy boıynsha poıyz jelige shyqty.

Onyń ishinde 2 júrdek jáne 5 elektr poıyzdary bar. Olar jyl saıyn 380 myńnan astam adamdy tasymaldaıdy.