Bıyl qansha qasqyr men shıbóri atýǵa ruqsat berildi

NUR-SULTAN. QazAqparat – Qazaqstanda qasqyr men shıbóri sanyn retteý lımıti bekitildi. Bul jaıynda QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet Facebook-tegi paraqshasynda jazdy, dep habarlaıdy QazAqparat tilshisi.

«Jyl saıyn bıologııalyq dáıektemege arnalǵan memlekettik ekologııalyq saraptama jasaý boıynsha Qazaqstan Respýblıkasy aýmaǵyndaǵy qasqyr men shıbóri sanyn retteý lımıti bekitiledi. Retteýge ruqsat berý memlekettik qyzmet sanalady jáne elektrondy portal arqyly oblystyq orman sharýashylyǵy jáne janýarlar álemi ınspektsııasymen kórsetiledi. Árbir ańshy elektrondy portal arqyly onlaın ótinim bere alady. Qyzmet ataýy: «Sany retteý jatatyn ań túrlerin atýǵa ruqsat berý», - dep atap ótedi ol.

Onyń atap ótýinshe, ınternet bolmaǵan jaǵdaıda bul qyzmetti kez kelgen Halyqqa qyzmet kórsetý ortalyǵynan alýǵa bolady.

«Qasyr men shıbóri halyqtyń densaýlyǵyn qorǵaý, aýyl sharýashylyǵy jáne ózge de úı janýarlaryn aýrýlardan saqtap qalý, qorshaǵan ortaǵa shyǵyn keltirmeý, aýyl sharýashylyǵy qyzmetine aıtarlyqtaı shyǵyn kelý qaýpin boldyrmaý maqsattynda sany retteý jatatyn ań túrleriniń tizimine kiredi. 2020 jyly respýblıka boıynsha jalpy 4 824 qasqyr men 11 733 shıbóri atýǵa ruqsat beriledi», - dedi Sáken Dildahmet.