Bıyl qandas mártebesin qansha etnıkalyq qazaq aldy
Eńbek jáne halyqty áleýmettik qoldaý mınıstrliginen málim etkendeı, jalpy 1991 jyldan beri respýblıkaǵa 1 mln 120,7 myń etnıkalyq qazaq oraldy.
Jyl basynan qandastardyń 55,2% – Ózbekstannan, 19,2% – Qytaıdan, 9,8% – Mońǵolııadan , 8,6% – Reseıden, 5% – Túrikmenstannan jáne 2,3% basqa elderden keldi.
Olardyń arasynda eńbekke qabiletti jastaǵy azamattar sany 63%, eńbekke qabiletti jastan kishiler 28,4% jáne zeınetkerler 8,6% quraıdy.
Eńbekke qabiletti jastaǵy qandastar arasynan 16% joǵary bilimi bar, 36% orta kásibı bilimdi, 39,9% jalpy orta bilimdi.
Qonys aýdarýshylar respýblıkanyń túrli óńirine turaqtandy.
Elde qandastardy qonystandyrý úshin eńbek kúshi tapshy óńirler anyqtalǵanyn aıta keteıik, olar: Aqmola, Abaı, Qostanaı, Pavlodar, Shyǵys jáne Soltústik Qazaqstan oblystary.
Osy óńirlerge qonystanǵan qandastarǵa sýbsıdııa túrinde memlekettik qoldaý sharalary usynylady – bir mezgilde otaǵasyna jáne otbasynyń árbir múshesine 70 AEK (241,5 myń teńge) mólsherinde; turǵyn úı jaldaýǵa jáne kommýnaldyq qyzmetterge aqy tóleýge – bir jyl ishinde 15-ten 30 AEK (51,7-den 103,5 myń teńgege deıin) mólsherinde.
Jyl basynan 653 qandasqa túrli qoldaý sharalary kórsetilgen. Atap aıtqanda, 431 adam turaqty jumysqa ornalastyryldy, 653 adam birjolǵy sýbsıdııa aldy, al 334 qandasqa turǵyn úı shyǵyndary sýbsıdııalandy.
«Sonymen qatar erikti qonys aýdarýdyń tıimdiligin arttyrý maqsatynda azamattardy soltústik óńirlerge qonys aýdarýǵa qatysatyn jumys berýshilerdi qoldaý boıynsha ınstıtýtsıonaldyq sharalar qabyldandy. Turǵyn úı satyp alý, salý úshin nemese ıpotekalyq turǵyn úı qaryzdary boıynsha bastapqy jarnanyń bir bóligin jabý úshin ekonomıkalyq utqyrlyq sertıfıkaty turǵyn úı qunynyń 50% nemese bir otbasyna 4 mln teńgege deıin mólsherinde birjolǵy óteýsiz jáne qaıtarymsyz negizde engizildi», - delingen mınıstrlik málimetinde.
Qonystandyrý óńirlerinde qandastardy qabyldaý kvotasy 2023 jylǵa 1 925 adamdy quraıdy. 1 tamyzǵa deıin 1 491 azamat kóship keldi.