Bıyl iri halyqaralyq jarystarda qazaqstandyq oqýshylar 26 medal jeńip aldy
«Halyqaralyq Olımpıada júldegerlerimen beıresmı kezdesý ótkizdim. Bıyl iri halyqaralyq jarystarda oqýshylarymyz 26 medal jeńip aldy, onyń ishinde 2 altyn, 13 kúmis jáne 11 qola. Nátıjesinde, sońǵy jyldardaǵy rekord jańartyldy. Kezdesýge qatysqan balalar jeńiske jetý jolyndaǵy qyzyqty oqıǵalarymen bólisip, usynystaryn aıtty, sonymen qatar suraqtaryna jaýaptar aldy , - dep jazdy mınıstr áleýmettik jeledegi paraqshasynda.
Osy oraıda A. Aımaǵambetov oqýshylarmen jáne jattyqtyrýshylarmen olımpıadalyq qozǵalysty aldaǵy ýaqytta odan ári damytý baǵyttary talqylanǵanyn aıtty.
Bıyl olımpıadanyń respýblıkalyq kezeńi jańa elektrondyq formatta ótti. Sondaı-aq akademııalyq adaldyqty qamtamasyz etý maqsatynda jańa sharalar qabyldandy.
«Jattyqtyrýshylar men mektep oqýshylary osy baǵyttaǵy jumysty kúsheıtý boıynsha qosymsha qadamdar usyndy. Daryndy balalardy qoldaý máselesine keletin bolsaq, qazirgi tańda el Prezıdenti Qasym-Jomart Kemeluly Toqaevtyń tapsyrmasyna saı mınıstrlik bul baǵytta júıeli jáne keshendi sheshimder ázirlep jatyr. Kezdesý sońynda Olımpıada júldegerlerine Memleket basshysynyń atynan Alǵys hattar tabys etildi. Sonymen birge biz jattyqtyrýshylardyń eńbegin de atap óttik. Buǵan deıin meniń atymnan 3 myń daryndy balanyń ata-analaryna Alǵys hattar jiberilgen bolatyn. Men olımpıada qatysýshylarynyń muǵalimderine, ata-analary men jattyqtyrýshylaryna taǵy da alǵys aıtqym keledi. Sizderdiń mundaı nátıjelerge qol jetkizýde eńbekterińiz orasan zor. Óz kezeginde Bilim jáne ǵylym mınıstrligi oqýshylarymyzdyń bıik belesterdi odan ári baǵyndyryp, Qazaqstandy álemdik arenada laıyqty deńgeıde tanytýlaryna jaǵdaı jasaýdy jalǵastyratynyn atap ótkim keledi», - dedi vedomstao basshysy.