Bıyl ınternet-resýrstarda ornalastyrylǵan 12 myńnan astam quqyqqa qarsy materıal joıyldy
«Aqparattyq doktrınanyń negizgi baǵyty eldiń jáne onyń azamattarynyń aqparattyq qaýipsizdigin qamtamasyz etý, aqparattyq syn-qaterler men táýekelderge ýaqtyly den qoıý bolyp tabylady. Ony iske asyrý aqparattyq keńistiktegi bar problemalardy sheshýge, yqtımal táýekelderdiń aldyn alýǵa jáne osy salada júıelik saıasatty jolǵa qoıýǵa múmkindik beredi. Sonymen qatar, aqparattyq zańnamany jetildirý sheńberinde Aqparat jáne qoǵamdyq damý mınıstrligi «Mass-medıa týraly» Zań jobasyn ázirledi. Onda jýrnalısterdiń mártebesin arttyrý, memlekettik aqparattyq saıasatty qarjylandyrý tetikterin reformalaý jáne tirkeý qaǵıdattaryn qaıta qaraý, memlekettik organdarmen ózara is-qımyldy jetildirý, ózin-ózi retteý ınstıtýttaryn damytý jónindegi normalar kózdelgen», - dep atap ótedi Úkimet basshysy jaýabynda.
Onyń atap ótýinshe, zań jobasy halyqaralyq standarttarǵa sáıkes buqaralyq aqparat quraldary salasyndaǵy retteýdiń normatıvtik negizin tujyrymdamalyq jańartýǵa baǵyttalǵan. Budan basqa, Aqparat mınıstrligi «Internet-jarnama jáne onlaınplatformalar týraly» Zań jobasyna retteýshi saıasattyń konsýltatıvtik qujatyn ázirledi. Joba kópshilik talqylaý rásiminen ótýde.
«Aqparattyq qaýipsizdikti qamtamasyz etý maqsatynda respýblıkalyq jáne óńirlik baspa BAQ, telearnalar, otandyq jáne sheteldik ınternet-resýrstardyń jumysyna únemi monıtorıng júrgiziledi. Qazaqstan Respýblıkasy zańnamasynyń talaptaryn saqtaýdy qamtamasyz etý maqsatynda ýákiletti organ áleýmettik jelidegi birshama tanymal onlaınplatformalarmen jumystar atqarýda», - dedi Premer-Mınıstr.
Úkimet basshysy Aqparat mınıstrligi ákimdiktermen birlesip, mádenı-otbasylyq qundylyqtar men adamgershilik qasıetterdi dáripteý, sondaı-aq qoǵam men balalardy zııandy áserden qorǵaýdy qamtamasyz etý boıynsha jumystar júrgizip jatqanyna nazar aýdartady.
«Jastardyń sanasy men psıhıkasyna teris áser etetin materıaldardyń taralýyna jol bermeý boıynsha júıeli is-sharalar qabyldanýda. Osy jyly ınternet-resýrstarda ornalastyrylǵan 12 myńnan astam quqyqqa qarsy materıal joıyldy. Bul jumys jalǵasyn tabatyn bolady», - dedi Álıhan Smaıylov.