Bıyl ıgerilmeı jatqan 5 mln gektar jer memleketke qaıtaryldy

ASTANA. QazAqparat – Bıyl ıgerilmeı jatqan 5 mln gektar jer memleket menshigine qaıtaryldy. Bul týraly Aýyl sharýashylyǵy mınıstrliginiń baspasóz qyzmetinen málim etti, dep habarlaıdy QazAqparat tilshisi.

«Búgingi tańda aǵymdaǵy jyldyń sońyna deıin paıdalanylmaıtyn jáne zańnamany buza otyryp berilgen 5 mln gektar jerdi qaıtarý josparly merziminen buryn oryndaldy.

Sondaı-aq, tıisti sharalar qabyldanǵannan keıin, Aýyl sharýashylyǵy mınnıstrliginiń jer ınspektorlary aǵymdaǵy jyly jumys istep turǵan sýbektilerdiń 1,8 mln gektar aýyl sharýashylyǵy jerin ıgerýge kiristi», - delingen vedomstvo habarlamasynda.

Mınıstrlik dereginshe, kelesi jyly ıgerýsiz jatqan aýyl sharýashylyǵy maqsatyndaǵy taǵy 5 mln gektar jer memleketke qaıtarylmaq. Búginde olardy qaıtarý boıynsha jumystar qolǵa alynǵan.

Eske salaıyq, buǵan deıin QR Parlamenti Májilisiniń depýtaty Erlan Saırov Qazaqstannyń eń shuraıly jerleri ıgerilmeı jatqanyn málimdep edi.