Bıyl halyqtyń jalpy ólim-jitimi 28 paıyzǵa tómendedi – Ajar Ǵınııat
«Halyqtyń densaýlyǵyn nyǵaıtý - Úkimettiń mańyzdy mindetteriniń biri. Memleket basshysynyń halyqqa medıtsınalyq kómek kórsetýdiń tıimdiligin arttyrý jónindegi tapsyrmalary aıasynda keshendi jumys júrgizip jatyrmyz. Elimizde bıyl resmı statıstıka boıynsha densaýlyq saqtaýdyń negizgi kórsetkishteriniń oń úrdisi baıqalady. 2020-2021 jyldary pandemııaǵa baılanysty halyqtyń densaýlyǵy kúrt nasharlaǵan bolatyn. Ol tek Qazaqstanda ǵana emes, barlyq dúnıejúzinde baıqalǵan úrdis. Máselen, ótken jyldyń uqsas kezeńimen salystyrǵanda bıyl 9 aıda halyqtyń jalpy ólim-jitim kórsetkishi 28 paıyzǵa tómendep otyr», - dedi mınıstr.
Onyń dereginshe, qan aınalymy júıesi aýrýlarynan bolatyn ólim-jitim kórsetkishiniń shamamen - 32, obyrdan – 9, jaraqattan - 4, tynys alý aǵzalarynyń aýrýlarynan bolatyn ólim-jitim - 33, al týberkýlezden bolatyn ólim-jitimniń 17 paıyzǵa tómendegeni baıqalady.
«Bıyl ana ólimi 3,5 ese tómendedi. Al balalar arasyndaǵy aýrýlar qazirgi aldyn alý zertteýlerdiń arqasynda jáne kovıdtiń saldarynan búginde ósip otyr. Halyq densaýlyǵy kórsetkishteriniń jaqsarýy halyqaralyq reıtıngterde de baıqalady. Máselen, 2021 jyldyń qorytyndysy boıynsha Birikken Ulttar Uıymynyń turaqty damý maqsattary reıtınginde Qazaqstan pozıtsııasynyń jaqsarǵany baıqalady. 2020 jyly 193 eldiń ishinde Qazaqstan 65-shi oryndy ıelendi. Al 2022 jyldyń basynda Birikken Ulttar Uıymy bizdiń memleketimizdiń reıtıngin 6 pozıtsııaǵa kóterip, 59-orynǵa deıin jaqsartty», - dedi Ajar Ǵınııat.