Bıyl gazdandyrý deńgeıi 50 paıyzdan asýy tıis - Roman Sklıar

NUR-SULTAN. QazAqparat - 2020 jyly Qazaqstandy gazdandyrý deńgeıi keminde 52 paıyzǵa jetýi tıis. Bul týraly búgin Energetıka mınıstrliginiń alqa otyrysynda QR Premer-Mınıstriniń orynbasary Roman Sklıar aıtty, dep habarlaıdy QazAqparat tilshisi.

«Óńirlerdi gazdandyrý eldiń áleýmettik-ekonomıkalyq damýyna úlken mýltıplıkatıvti áserin tıgizýmen qatar qalalardaǵy ekologııalyq jaǵdaıdyń aıtarlyqtaı jaqsarýyna sep bolady. 2020 jyly elimizde gazdandyrylý deńgeıi keminde 52 paıyz bolýy qajet», - dedi Roman Sklıar.

Úkimet basshysynyń orynbasary Energetıka mınıstrligine qarasty salalardaǵy tıimdilikti, ashyqtyqty arttyrý úshin zamanaýı tsıfrlyq tehnologııalardy jan-jaqty engizý qajettigin atap ótti. Sonymen qatar ol munaı óndirý kólemi jyldan-eylǵa tómendep kele jatqan Qyzylorda men Aqtóbe oblystarynda kásiporyndardyń úzdiksiz jumys isteýi máselesine aıryqsha nazar aýdartty. Júzege asyrylyp jatqan jobalardaǵy qazaqstandyq qamtý úlesin arttyrý qajettigin de aıtty.

«Premer-Mınıstrdiń jergilikti qamtýdy damytý boıynsha bergen tapsyrmalary sapaly ári josparlanǵan merzimde oryndalýy tıis. Bul rette munaı-gaz mashınasyn jasaý salasyn damytý sharalarynyń josparyn júzege asyrýǵa erekshe nazar aýdarýlaryńyz qajet. Mashına jasaý ónimderiniń jyldyq ımportynyń jalpy kólemi shamamen 800 mlrd teńgeni quraıdy. Al munaı-gaz mashınalaryn jasaý ishki óndirisiniń kólemi ne-bári 53 mlrd teńgeni ǵana quraıdy. Demek, óndiristi odan ary damytýǵa úlken qor bar», - dedi Roman Sklıar.