Bıyl esirtki jarnamalaıtyn 69 saıt buǵattaldy

ASTANA. QazAqparat – Bıyl esirtki jarnamalaıtyn 69 ınternet paraqshasy men saıt buǵattaldy. Bul týraly ІІM Esirtki qylmysyna qarsy is-qımyl departamentiniń ókili Danııar Oralov aıtty, dep habarlaıdy QazAqparat tilshisi.

«2022 jyly «Kıberqadaǵalaý» aqparattyq júıesi arqyly 1 996 esirtki saıtynyń jumysyna shekteý qoıylyp, onyń 1 493 buǵattaldy. Osy jyldyń basynan bastap 179 ınternet paraqshalary men saıttar shekteýge jiberilip, 69 buǵattaldy. Aqparattyq tehnologııa ozǵan zamanda kóshten qalýǵa áste bolmaıdy. Sondyqtan, polıtsııa óz jumysyna ІT-tehnologııalardy jappaı engizýde», - dedi Danııar Oralov mınıstrliktiń baspasóz qyzmeti alańynda ótken brıfıngide

Onyń atap ótýinshe «Qazaqstan Respýblıkasynda nashaqorlyqpen jáne esirtki bıznesimen kúrestiń 2023-2025 jyldarǵa arnalǵan keshendi josparyna» sáıkes, aýmaqtyq Esirtki qylmysyna qarsy is-qımyl basqarmalarynda zańsyz kontentti anyqtaý úshin keń jolaqty ınternetke qosylǵan zamanaýı apparattyq-baǵdarlamalyq keshenderi engizilip jatyr.