Bıyl Esil aýdanyna gaz taratý jelileriniń qurylysy bastalady - Kólginov

NUR-SULTAN. QazAqparat - Nur-Sultan qalasynyń ákimi Altaı Kólginov Zarechnyı eldi mekenin damytý máselesin jergilikti turǵyndarmen kezdesý barysynda talqylady, dep habarlaıdy QazAqparat tilshisi ákimniń Instagram paraqshasyna silteme jasap.

«Aýdandarymyzdy, eldi mekenderimizdi turaqty aralap, turǵyndarmen kezdesip turamyz. Bul joly Zarechnyı (Esil aýdany) eldi mekeniniń turǵyndarymen kezdestim. Kezdesý barysynda birqatar ózekti másele kóterildi: mektep, balabaqsha salý jáne keńeıtý, sý qysymy, elektr qýaty, joldar men avtobýs baǵyttary, jyly aıaldamalar men Sergek kameralary, gúlzarlar jáne t.b. Qozǵalǵan problemalardy jazyp aldyq, endi olardy iske asyrý boıynsha jospar quramyz.

№45 mektep boıynsha – tehnıkalyq saraptama júrgizilgen soń kúrdeli jóndeýden ótedi. Oqýshy ornynyń qajettiligin eskerer bolsaq, birinshi kezekte osy mekteptiń aýmaǵynda jańa korpýs salý máselesin qarastyramyz. Sol sııaqty №56 balabaqshany da kúrdeli jóndeýden ótkizýdi josparlap otyrmyz», - degen A.Kólginov áleýmettik jelidegi jazbasynda.

Ol sýmen jabdyqtaý da júıeli problema ekenin atap ótken.

«Osyǵan deıin aıtqanymdaı, byltyr biz sorǵy-súzgi stantsııasy-3 (SSS) qurylysyna kiristik. SSS-3-tiń alǵashqy kezeńi bıyl kúzde iske qosylady. Al tolyǵymen 2023 jyly aıaqtalady. SSS-3 qalanyń aldaǵy ýaqytta salynatyn aýdandaryn aýyz sýmen qamtamasyz etýge, sondaı-aq sýmen jabdyqtaýdyń qazirgi qýatyn arttyrýǵa múmkindik beredi.

Bul eldi mekende jeke sektor baryn eskersek, ony gazdandyramyz. Osyǵan deıin Saryarqa men Almaty aýdandary gazdandyrylǵan. Bıyl Esil aýdanynda gaz taratý jelileriniń qurylysyn bastaýdy josparlap otyrmyz. Bul aýdannyń jáne jalpy qalanyń ómir súrý sapasy men ekologııasyn jaqsartýǵa múmkindik beredi», - dep jazady qala ákimi.

Ol bul eldi mekendi josparly túrde damytatyndaryn aıtqan. Zarechnyı eldi mekeniniń turǵyndary kótergen máselelerdi nazarǵa alyp, osy baǵytta tıisti jumystar atqarylatynyna sendiredi.

«Osylaısha biz barlyq aýdandarymyz ben eldi mekenderimizdi turaqty aralap, jergilikti jerlerde turǵyndardyń problemalaryna nazar aýdaramyz. Osynyń nátıjesinde eń aldymen ne isteý kerek, qandaı máseleler boıynsha jospar qurý qajet jáne t.b. sheshimder qabyldanady. Eldi mekenderdi damytý Memleket basshysynyń tikeleı baqylaýynda.

Kún raıy jylynǵan ýaqyttan bastap qala kóshelerin jóndeý, aýlalardy, qoǵamdyq keńistikterdi abattandyrý, kógaldandyrý jáne t.b. jumystarǵa kirisemiz», - deıdi elorda basshysy.