Bıyl elordanyń turǵyn alaptaryndaǵy ınfraqurylymdy damytýǵa 8,8 mlrd teńge bólindi

ASTANA. QazAqparat – Bıyl elordanyń turǵyn alaptaryn damytý úshin 8,8 mlrd teńge bólindi. Onyń ishinde respýblıkalyq bıýdjetten 7,3 mlrd jáne jergilikti bıýdjetten 1,5 mlrd teńge. Muny búgin bas shahardyń maslıhatynda baıandama jasaǵan Astana qalalyq Kólik jáne jol-kólik ınfraqurylymyn damytý basqarmasy basshysynyń mindetin atqarýshy Mereı Baıyrhan aıtty, dep habarlaıdy QazAqparat tilshisi.

«Bólingen qarajatqa qalanyń 6 turǵyn alabynda 7 jobany iske asyrý josparlanýda. Mysaly, Ońtústik-Shyǵys turǵyn alabynda ınjenerlik jeliler men joldardy salý boıynsha birinshi jáne ekinshi kezektegi qos joba iske asady. Jobaǵa saı, barlyǵy 20 kóshe salý qarastyrylǵan. Jobanyń alǵashqy kezeginde 6 kóshe salý josparlanyp otyr. Birinshi kezektegi jumystardyń quny 6,9 mlrd teńge», - dedi basqarmasy basshysynyń mindetin atqarýshy Mereı Baıyrhan.

Onyń aıtýynsha, kelesi kezektegi ınjenerlik jeliler men joldardy salý jumysyna shamamen 13,6 mlrd teńge jumsalmaq.

«Birinshi kezektegi jumystardy oryndaý tolyq aıaqtaldy. Ol - Esil, Buqtyrma, Edil, Jaıyq kósheleriniń boıynda ınjenerlik jeliler, joldar salý. Atalǵan kóshelerdi aǵymdaǵy jyly qalanyń kommýnaldyq menshigine berý josparlanýda. Ekinshi kezekte atqarylatyn jumystar Ertis, Degeres, Aqarys kóshelerin qamtıdy. Olar da bıyl qalanyń balansyna berilmek», - dedi Mereı Baıyrhan.

Onyń aıtýynsha, 3 jáne 4 kezektegi jumystardy bastaý úshin jobalaý-smetalyq qujattar respýblıkalyq bıýdjet komıssııasynyń qaraýyna jiberilgen. Jalpy olar 2024 jyly qolǵa alynady dep josparlanyp otyr.