Bıyl elordada qurylysy uzaqqa sozylǵan 20 úıge 8 myń úlesker qonystanady

NUR-SULTAN. QazAqparat - Bıyl Nur-Sultanda qurylysy uzaqqa sozylǵan 500 myń sharshy metr turǵyn úılerdiń qurylysy aıaqtalady, dep habarlaıdy QazAqparat elorda ákimdiginiń resmı saıtyna silteme jasap.

Bul degenimiz - 20 turǵyn úı kesheni. 8 myńǵa jýyq úlesker páter ıesi atanyp, úı qujattaryn rásimdeı alady.

Búgin elorda ákimi Altaı Kólginov jumys sapary barysynda «Jastar 4», «Arystan», «Garant» sııaqty birqatar úlestik qurylys nysandaryn aralady.

«Turǵyn úı kesheninde jumystar qaıta bastaldy. Páterimizdi jyl saıyn kúttik. Al qazir qurylys jumystarynyń jandanǵanyn óz kózimizben kórip turmyz. Ótken jyldyń kúzimen salystyratyn bolsaq, kóp jumys atqaryldy. Ózimiz úshin de, basqa da úleskerler úshin de qýanyshtymyz», - dep atap ótti turǵyn úı úleskerleri.

Elorda ákimi Altaı Kólginov barlyq sanıtarlyq normalardy qatań saqtaý kerektigin aıtty.

«Pandemııany eskere otyryp, nysandarda barlyq talaptardy qatań saqtaý qajet. Jumysty tıisti deńgeıde júrgizý mańyzdy. Qurylys sapaly bolýy kerek. Qalany abattandyrý qajet», - deıdi qala basshysy.

Ótken jyly 2,5 myń úleskeri bar 10 úı paıdalanýǵa berildi. Árbir úlestik qurylys nysany boıynsha qadamdyq is-sharalar jospary ázirlendi.