Bıyl elordada 4 myń úlesker otbasy kópten kútken baspanasyna kiredi - ákim
Ákim bul jaıynda Instagram paraqshasynda jazdy.
«Qorǵaljyn kvartaly», «Mırnyı dom», «Arabı 2 – Granıtnyı 2», «Zere-2», «Arystan», «Future Home», «Sadovye kvartaly», «Terrıtorııa komforta-1 2-kezek» turǵyn úı keshenderiniń úleskerlerimen kezdestim. Olarmen birge qurylys barysyn baqylaýda ustaımyz. Qurylysy uzaqqa sozylǵan ǵımarattardyń jaǵdaıy ártúrli. Bir jerinde úıdiń tek jaqtaýy ǵana bar bolsa, endi bir tusynda tek qazanshuńqyry ǵana qazylǵan. Máselen «Arystan» turǵyn úı kesheniniń qurylysy 11 jyl buryn bastalǵan. Al nysandy ótkizý kezinde tek 20-30% ǵana daıyn edi. «Sadovye kvartaly» turǵyn úı kesheni 8 jyl buryn problemaly dep tanylsa, nysandy ótkizý kezinde irgetasy ǵana bar bolatyn», - deıdi ol.
Jeńis Qasymbektiń aıtýynsha, myńdaǵan úlesker otbasy baspanasyn kútip júr.
Memleket basshysynyń tapsyrmasyna sáıkes, qurylysy uzaqqa sozylǵan nysandardy aıaqtaý boıynsha aýqymdy júıeli jumys júrip jatyr.
Ár úı boıynsha qadamdyq is-sharalar jospary bar.
«Bıyl qurylysy uzaqqa sozylǵan 30 turǵyn úı keshenin aıaqtaýdy josparlap otyrmyz. Bul – shamamen 4 myń úlesker otbasy. Olardyń bir bóligin aıaqtadyq. Úleskerler kezdesýde abattandyrý, ınjenerlik jeliler salý jáne basqa máselelerdi kóteredi. Biz óz tarapymyzdan merdigerlerge barynsha kómek kórsetemiz. Degenmen olardyń úleskerlerdi jalǵan ýádemen úmittendirýine jol bermeımiz. Bizdiń mindetimiz – uzaq qurylystardy aıaqtaý jáne úleskerlerge páter kiltin tapsyrý», - dep atap ótti Jeńis Qasymbek.