Bıyl elordada 22 myńnan astam adam jumyspen qamtylady – Azamat Baıtasov
«2021 jyly «Jumyspen qamtý» jol kartasy aıasynda 14 ınfraqurylymdyq joba iske asyrylyp, 635 jumys orny quryldy. Baǵdarlama qatysýshylarynyń ortasha jalaqysy 115 myń teńgeni qurady. Al ataýly áleýmettik kómek kórsetý maqsatynda ortalyq 2021 jylǵy 1-toqsanda– 3 773 otbasyna, 2-toqsanda – 3 302 otbasyna, 3-toqsanda – 2 992 otbasyna, 4 toqsanda 2 909 otbasyna AÁK taǵaıyndady», - dedi ol qala ákimdiginde ótken brıfıng barysynda.
Onyń dereginshe, Halyqty jumyspen qamtý ortalyǵynda 3 823 jumyssyz, onyń ishinde 915 jas esepte tur.
«Jyl basynan beri 1614 adamdy jumysqa ornalastyrdyq. Onyń ishinde 558-i - jastar. 2022 jyly jumyspen qamtýdyń belsendi sharalarymen 22 myńǵa jýyq adamdy qamtý josparlanyp otyr. Onyń ishinde 7 150 adamdy turaqty jumys oryndarymen qamtıymyz. «Jastar» tájirıbesine 998 adam jiberiledi. Qazirgi tań bul baǵdarlama aıasyndaǵy jalaqy 122 myń teńgeni quraıdy. Jalaqyny memleket tóleıdi. Áleýmettik jumys oryndaryna 130 adam joldaımyz. Baǵdarlama aıasynda jalaqynyń 35 paıyzyn memleket sýbsıdııalaıdy. Máselen, jumys berýshi mundaı azamattarǵa 100 myń teńge jalaqy taǵaıyndasa, onda onyń 35 myńyn memleket, qalǵanyn jumys berýshi ózi tóleıdi. Qoǵamdyq jumystarǵa 1 307 azamatty jiberemiz. Alǵashqy jumys ornyna 179 adam jiberiledi. Memleket tarapynan tólenetin jalaqy mólsheri 91 myń teńgeni quraıdy. Sonymen qatar bıyl «Urpaqtar kelisimsharty» baǵdarlamasyn iske asyramyz», - dedi Azamat Baıtasov.