Bıyl elorda oqýshylaryna 1 mlrd teńgege medıtsınalyq kómek kórsetilgen
Jalpy sońǵy 9 aıynda elorda oqýshylaryna 1 mlrd teńgeden astam somaǵa konsýltatsııalyq-dıagnostıkalyq qyzmet kórsetilgen.
Mektep medıtsınasy bilim berý uıymdarynda, ıaǵnı tikeleı mektepterde, balabaqshalarda, shaǵyn ortalyqtarda nemese basqa da bilim berý uıymdaryndaǵy balalarǵa medıtsınalyq qyzmet kórsetýdi kózdeıdi.
Buryn mektep medıtsınasy ýchaskelik qyzmetke bólingen qarajat esebinen qarjylandyrylǵan. MÁMS júıesin engizý arqyly ol jeke ustanym retinde bólek qarastyryldy. Bul mektep jasyndaǵy balalarǵa arnalǵan aldyn alý sharalarynyń keń aýqymyn qamtýǵa múmkindik beredi. ıAnı, bul medıtsınanyń osy bóligine – syrqattyń aldyn alý úshin tolyqtaı tekserýge, qandaı da bir syrqat anyqtalǵan balalardy der kezinde «D» esepke alýǵa, barlyq standarttardyń saqtalýyn baqylaýǵa, t.b. erekshe nazar aýdarylady.
Mektep medıtsınasynyń máni – bilim berý uıymdaryndaǵy balalardy qajetti medıtsınalyq qyzmettermen qamtamasyz etý. Bul jumys mektep nemese balabaqsha ornalasqan aýmaqqa qarasty emhana jaýapkershiliginde bolady. Ol úshin mektepte medıtsına qyzmetkeriniń jabdyqtalǵan kabınetteri bar arnaıy qyzmet qurylady. Profılaktıkalyq tekserý nemese vaktsınatsııa júrgizý úshin mektepke (nemese balabaqshaǵa) tıisti profıldegi dárigerler keledi. Mundaı is-sharalar aldyn-ala josparlanady, jáne ata-analarǵa aldyn ala habarlanady.
«Mektep medıtsınasy bólimshesiniń mindetteri men mańyzdy baǵyttarynyń biri bólimshe qyzmetiniń jumysyn uıymdastyrý bolyp tabylady. Shynynda da, mektepke deıin jáne mektep jasynda balalardyń salaýatty ómir súrýi qalyptasady, olar ortaǵa beıimdeledi, balanyń densaýlyǵy kúsheıedi nemese, kerisinshe, tómendeıdi. Mektep medıtsınasy bólimshesiniń jumysy osyndaı jaǵdaılardy baqylap, densaýlyq jaǵdaıyndaǵy jaǵymsyz protsesterdiń damýyn boldyrmaý úshin uıymdastyrylǵan. Bilim berý mekemeleriniń oqýshylary men tárbıelenýshilerin medıtsınalyq kómekpen qamtamasyz etý balalar emhanasynyń mektepke deıingi–mektep bólimshesine júktelgen. Bul bólimshe balalar emhanasynyń barlyq basqa bólimshelerimen tyǵyz baılanysta jumys isteıdi. Mektep medıtsınasy bólimshesiniń qurylymyna bilim berý mekemelerindegi medıtsınalyq kabınetter kiredi. Bizdiń emhana aýmaǵy boıynsha bólimshede 16 mektep pen 10 memlekettik balabaqsha bar»,- deıdi Astana qalasyndaǵy №9 emhananyń mektep medıtsınasy bólimshesiniń meńgerýshisi Azamat Kenjebolatuly Myńbaev.
Mektep medıtsınasynyń tarıfine vaktsınatsııa, jyl saıynǵy profılaktıkalyq tekserý, tis dárigeriniń tikeleı oqý ornynda júrgizetin tekserýi kiredi. Sondaı-aq oqý ornyndaǵy dárigerler balalarǵa salaýatty ómir saltyn ustaný jóninde is-sharalar ótkizedi. Eger profılaktıkalyq tekserýde patologııa anyqtalǵan bolsa, onda bala tirkelgen jeri boıynsha emhanaǵa tereńdetilgen medıtsınalyq tekserýge jiberiledi. Balalardyń vaktsınatsııalaýy ata-analarynyń kelisimimen Ulttyq egý kúntizbesi boıynsha júrgiziledi. Shuǵyl jaǵdaılarda medıtsınalyq pýnktte jedel járdem brıgadasy kelgenge deıin balalarǵa alǵashqy kómek kórsetiledi.