Bıyl elimizdiń joǵary oqý oryndarynda bilim alý úshin 490 sheteldikke grant berilgen

ASTANA. QazAqparat – Bıyl elimizdiń joǵary bilim berý oryndarynda oqý úshin 490 shetel azamatyna grant berilgen. Bul týraly Ortalyq kommýnıkatsııalar qyzmetinde ótken brıfıngte Ǵylym jáne joǵary bilim vıtse-mınıstri Qýanysh Erǵalıev málim etti, dep habarlaıdy QazAqparat tilshisi.

Brıfng barysynda 2026 jylǵa deıingi joǵary bilim berýdiń basymdyqtary týraly aıtqan vıtse-mınıstr jyl saıyn bólinetin grant sany ósip kele jatqanyn atap ótti.

«2022-2023 oqý jylyna 88 214 grant bólingen. Onyń ishinde, bakalavrıatqa - 73 061, magıstratýraǵa - 13 263, doktorantýraǵa - 1 890 oryn. Bulardyń 60 paıyzy nemese 42 303 grant tehnıkalyq mamandarǵa berilgen. 10 myń grant Atyraý jáne Mańǵystaý oblystarynyń jastary men halyq tyǵyz qonystanǵan aımaqtarǵa berilgen. «Serpin» baǵdarlamasyna 3 653 grant bólingen.

Odan bólek, shetel azamattaryna 490 grant bólingen. Sonyń ishinde, 150 grant - Orta Azııa memleketteriniń azamattaryna, 100 oryn - Islam yńtymaqtastyq uıymyna kiretin elderdiń azamattaryna berildi», - dep málim etti vıtse-mınıstr.

Sonymen qatar, brıfıng barysynda Qýanysh Erǵalıev aldaǵy 4 jylda joǵary bilim berýdi damytýdyń basym baǵyttaryn atady.