Bıyl elimizdiń Qarýly kúshterinde 86 qylmys tirkeldi
«Resmı málimetterge júginetin bolsaq, aǵymdaǵy jyldyń basynan beri Qarýly kúshterde 86 qylmys tirkeldi. Onyń ishinde merzimdi qyzmetke shaqyrylǵan qatardaǵy 2 jaýynger álimjettikke ushyraǵan. Al 2016 jyly 268 qylmys bolyp, onyń ishinde 11 jaýynger álimjettikke ushyraǵany belgili bolyp otyr», - dedi Tileýhan Basqojaev BAQ ókilderiniń saýalyna oraı.
Sondaı-aq brıfıng barysynda QR Qarýly Kúshteri Bas shtabynyń Uıymdastyrý-jumyldyrý jumystary departamenti basshysynyń orynbasary, Jınaqtaý basqarmasynyń basshysy, polkovnık Amantaı Úserbaev elimizde merzimdi áskerge shaqyrý aldaǵy ýaqytta da jalǵasa beretindigin aıtty.
«Birinshiden, qazirdiń ózinde bizdiń qarýly kúshterimizdiń 70 paıyzy kelisimshart boıynsha qyzmet atqarady dep aıtýǵa bolady. Ekinshiden, tehnıkalyq bólimder jáne áýe, teńiz kúshterindegi qyzmetshilerdiń 99 paıyzǵa jýyǵy kelisimshart boıynsha jumys isteıdi. Elbasynyń tapsyrmasyna sáıkes jáne jumyldyrý zapasyn tolyqtyryp otyrý úshin bizge merzimdi áskerı qyzmetke shaqyrý jumysyn jalǵastyrý qajet», - dedi Úserbaev.
Onyń atap ótýinshe, aǵymdaǵy kóktemde áskerı qyzmetke 16 myńǵa jýyq jas sarbaz shaqyrylyp otyr. Ol elimizdiń qarýly kúshterindegi merzimdi áskerı qyzmetshilerdiń jalpy sanynyń 25-30 paıyzyn quraıdy.
«Merzimdi áskerı qyzmetke shaqyrylǵan áskerı bólimderde kóp daıyndyqty qajet etpeıtin laýazymdarǵa qoıylady. Al joǵary bilim men uzaq ýaqyt daıyndyqty qajet etetin laýazymdarǵa kelisimsharttaǵy áskerı qyzmetshiler taǵaıyndalady», - dedi ol.