Bıyl elimizdegi joldardyń sapasy qaı deńgeıde bolady

NUR-SULTAN. QazAqparat – Jyl sońyna deıin respýblıkalyq mańyzy bar avtojoldardyń 90 paıyzyn jaqsy jáne qanaǵattanarlyq jaǵdaıǵa jetkizý josparlanyp otyr. Bul týraly Úkimet otyrysynda qańtar aıyndaǵy eldiń áleýmettik-ekonomıkalyq damýy taqyrybyn talqylaý kezinde QR Indýstrııa jáne ınfraqurylymdyq damý mınıstri Beıbit Atamqulov málim etti, dep habarlaıdy QazAqparat tilshisi.

«Shekteý sharalary kólik salasyndaǵy naqty kólem ındeksine teris áser etip otyr. 2021 jyly qańtar aıynda bul kórsetkish 82,6 paıyzdy qurady. Bul rette tranzıttik konteınerlik tasymalda 81,4 myń jıyrma fýnttyq balama kóleminde oń qarqyn saqtaldy. Ósim 27 paıyzdy qurady. Kóliktiń barlyq túrimen júk tasymaldaý kólemi 0,28 mlrd tonna nemese ótken jyldyń sáıkes kezeńimen salystyrǵanda 93,4 paıyzdy qurady», - dedi mınıstr.

Onyń aıtýynsha, jyl sońyna deıin respýblıkalyq mańyzy bar avtojoldardyń 90 paıyzyn jáne jergilikti joldardyń 76 paıyzyn jaqsy jáne qanaǵattanarlyq jaǵdaıǵa jetkizý josparlanyp otyr. 6,5 myń shaqyrym aqyly jol engizilip, ulttyq standartqa sáıkes keletin jol servısin 66 paıyzǵa jetkizý kózdelgen.

«Temir jol kóligimen tranzıt 23,1 mln tonnaǵa deıin nemese 12 pıayzǵa artady dep otyrmyz. Onyń ishinde konteınerler tranzıtin 1 mln jıyrma fýnttyq balamaǵa jetkizemiz», - dedi B. Atamqulov.