Bıyl elimizdegi temirjolda 13 adam mert boldy

NUR-SULTAN. QazAqparat – Bıyl elimizdegi temirjolda adamdardy qaǵyp ketýdiń 25 jaǵdaıy tirkeldi. Bul týraly «QTJ» UK» AQ Qozǵalys qaýipsizdigi departamenti dırektorynyń orynbasary Nııazbek Jańabaev málim etti, dep habarlaıdy QazAqparat tilshisi.

Osy oraıda ol QTJ adamdardyń jaraqat alý jaǵdaılary jıi tirkeletin ýchaskelerdi anyqtaǵanyn jetkizdi.

«Jaraqattanýdyń negizgi sebebi retinde zardap shekken adamdar temirjol arqyly ótý erejelerin elemeıtinin atap ótken jón. Jaıaý júrginshiler asyǵystyq tanytyp, mýzyka tyńdap, qaýipti ýchaskeler týraly eskertý belgilerine mán bermeıdi. Osynyń saldarynan kele jatqan lokomotıvterdiń eskertý dybystaryn da estimeıdi», - dedi Nııazbek Jańabaev temirjol nysandarynda jaraqattanýdyń aldyn alý máselelerine arnalǵan brıfıngide.

Onyń aıtýynsha, 2022 jylǵy 4 aıda adamdardy qaǵyp ketýdiń 25 jaǵdaıy tirkelse, onyń ishinde 13-i ólimmen aıaqtalyp, 12 adam jaraqat aldy. 5 jaǵdaıda zardap shekkender mas kúıinde bolǵan.

«QTJ» UK» AQ poıyzdardyń qarqyndy qozǵalysy bar 18 ýchaskeni anyqtady. Onda adamdardyń jaraqattaný jaǵdaılary jıi tirkeledi. Osy oraıda Shymkent, Almaty, Aqtóbe, Semeı, Jambyl, Qaraǵandy óńirleriniń stantsııalary men aralyqtaryn atap ótken jón», - dedi kompanııa ókili.

Onyń sózine qaraǵanda, qaýipti ýchaskelerde mashınıster poıyzdar jyldamdyǵyn azaıta otyryp, barynsha abaılap basqarady. Alaıda poıyzdyń tejeý qashyqtyǵy, ıaǵnı tipti baıaý jyldamdyqpen júrgenniń ózinde 800-1000 metrge jetedi.