Bıyl elimizde «Ulytaý» ulttyq parki qurylady

NUR-SULTAN. QazAqparat - Bıyl «Ulytaý» ulttyq parki qurylady. Bul týraly QR Ekologııa, geologııa jáne tabıǵı resýrstar vıtse-mınıstri Erlan Nysanbaev vedomstvonyń keńeıtilgen alqa otyrysynda aıtty, dep habarlaıdy QazAqparat tilshisi.

«Erekshe qorǵalatyn aýmaqtardy keńeıtý maqsatynda bıyl «Býrabaı» ulttyq parki men Barsakelmes qoryǵynyń amaǵyn keńeıtý sharalary bastaldy. Osy jyly «Ulytaý» jańa ulttyq parkin qurý josparlanǵan. Ol Ortalyq Qazaqstannyń dalalyq ekojúıesin qorǵaýǵa múmkindik beredi», - dedi ol.

Onyń aıtýynsha, kóshpeli jáne ishki týrızmdi damytý memlekettik baǵdarlamasynda 10 týrıstik aýmaq aıqyndalǵan. Onyń quramyna 6 ulttyq park kiredi.

«Baǵdarlamany júzege asyrý úshin mınıstrlik bıznes ókilderimen birge Іle Alataýy ulttyq parkinde ekologııalyq týrızmdi damytý josparyn ázirledi. Onyń negizinde ulttyq parktiń bas josparyna tıisinshe ózgertýler engizildi. Іle Alataýy ulttyq parki aýmaǵynda ekologııalyq týrızmdi damytýǵa ınvestıtsııanyń boljamdy somasy shamamen 27 mlrd teńgeni quraıdy. Dál osyndaı josparlar Altyn Emel, Sharyn jáne Kólsaı kólderi ulttyq tabıǵı parkteri úshin ázirlengen», - dedi vıtse-mınıstr.

Erlan Nysanbaevtyń aıtýynsha, atalǵan sharalar ekologııalyq týrızmdi damytýǵa tyń serpin berip, jańa jumys oryndaryn ashýǵa múmkindik jasaıdy. Sonymen qatar otandyq bızneske týrızmnen paıda tabýǵa jol ashady.